काठमाण्डौं । नेपाल राष्ट्र बैंकले मासिक रुपमा गणना गर्ने गरेको चालु आर्थिक बर्षको पछिल्लो अवस्था सार्वजनिक गर्दै शोधनान्तर घाटा तीन अर्ब ५० करोड रुपैयाँ भएको जनाएको छ ।
एक देशको अरु देशका बीचमा हुने वित्तीय लेनदेनको हिसावकितावलाई शोधनान्तर (ब्यालेन्स अफ पेमेन्ट, बिओपी) भनिन्छ । यसमा आयात निर्यातमा बस्तु तथा सेवा, वित्तीय पुँजी र वित्तीय अनुदान उपलब्ध हुनुका साथै रेमिटेन्स पनि गणना हुन्छ । यसलाई नेपाल राष्ट्र बैंकले मासिक रुपमा गणना गर्छ ।
आज रिपोर्ट सार्वजनिक गर्दै राष्ट्र बैंकले ब्यापार घाटा बढेको, विदेशी लगानीको लाभांस भुक्तानी उल्लेख्य बृद्धि भएको तथा वैदेशिक अनुदानमा कमी आएका कारण देशको ब्यालेन्सिटलाई असर गरेको बताएको छ । देशभित्रिने रकमभन्दा वाहिरिने वढि हुँदा देशको व्यालेन्सिट घाटामा जान्छ । गत आर्थिक बर्षको दुई महिनामा साढे २७ प्रतिशतले बढेको रेमिटेन्स अहिले जम्मा ६.६ प्रतिशतले मात्र वढेको छ ।
दुई महिनाको अवधिमा नेपालबाट १३ अर्ब १८ करोड रुपैयाँको बस्तु तथा सेवा बिक्री भएको छ । तर नेपालले भने एक खर्ब ४९ अर्ब २ करोड रुपैयाँको किनेको छ । यसले गर्दा ब्यापार घाटा एक खर्ब ३५ अर्ब ८४ करोड रुपैयाँ पुगेको छ ।
नेपालले भारतबाट मगाउने सामानको आयात ४९।८ प्रतिशत, चीनको २६।२ प्रतिशत र यी वाहेकका मुलुकबाट मगाउने सामानको आयात ३६।५ प्रतिशतले बढेको छ ।
५ कार्तिक २०७३, ३।१५
वि.सं.२०७३ कात्तिक ५ शुक्रवार १५:५२ मा प्रकाशित
