काठमाडौँ । तिहारमा तीन दिन मात्र सर्वजनिक बिदा हुने भए पनि यस पटकको तिहारमा भने पाँच दिन सार्वजनिक बिदा दिईने भएको छ । भारतीय राष्ट्रपति प्रणव मुखर्जीको भ्रमणका कारण बिदाको समय लम्बिएको हो ।
मन्त्रिपरिषद्को बिहिबारको बैठकले अबदेखि छिमेकी मुलुकहरु भारत र चीनका राष्ट्रप्रमुख नेपाल भ्रमण आउँदा सार्वजनिक वबदा दिने निर्णय पनि गरेको सूचना तथा सञ्चारमन्त्री सुरेन्द्रकुमार कार्कीले जानकारी दिए।
भारतीय राष्ट्रपति प्रणव मुखर्जी कात्तिक १७ गते बुधबार तीन दिने नेपाल भ्रमणमा आउँदै छन्। राष्ट्र प्रमुखहरु नेपाल आएको दिनमात्र बिदा दिने निर्णय भएको हो ।
कात्तिक १३ गते शनिबार परेको छ भने १४ गते आइतबार लक्ष्मीपूजा, १५ गते सोमबार गोवर्द्धन पूजा र १६ गते मंगलबार भाइटीकाको सार्वजनिक विदा छ। १७ गते बुधबार पनि भारतीय राष्ट्रपतिको भ्रमणका कारण विदा हुने भएको हो ।
मन्त्रिपरिषद्को बैठकले नेपाल घरेलु तथा साना उद्योग विकास समितिको रिक्त अध्यक्षमा सिन्धुली झाँगाझोली निवासी दीपेन्द्र आचार्यलाई नियुक्त गरेको छ।
यस्तै थानकोट–चित्लाङको गणेशमान मार्गको स्तरोन्नति गर्ने सरकारले निर्णय गरेको छ ।
प्रकाशित मितिः २०७३ कार्तिक ११
वि.सं.२०७३ कात्तिक ११ बिहीवार १५:०० मा प्रकाशित
