काठमाडौ। शरद ऋतुमा विभिन्न हिमाल आरोहणका लागि एक हजार ६९ जनाले आरोहण अनुमति लिएका छन् ।
यो मौसम (असोज र कात्तिक) पर्वतारोहणका लागि उपयुक्त भएकाले उल्लेख्य सङ्ख्यामा आरोही पर्वतारोहणका लागि जाने गर्छन् ।
आरोहण अनुमति यो महिनाभर लिने भएकाले आरोहीको सङ्ख्या अझै बढ्ने पर्यटन विभागले जनाएको छ ।
तुलनात्मक रुपमा यो वर्ष कमैले आरोहण अनुमति लिएका छन् । विभागका अनुसार सन् २०१४ मा एक हजार ३८५ जनाले आरोहण अनुमति लिएका थिए । सन् २०१५ मा नेपाल पर्वतारोहण सङ्घ (एनएमए) सहित दुई हजार ७२० जनाले आरोहण अनुमति लिएका थिए ।
यो मौसममा सर्वोच्च शिखर सगरमाथाबाहेक मनास्लु, कञ्चनजङ्गा, धौलागिरि अमा दब्लबलगायतका हिमाल तथा पिक आरोहण गर्न आरोही गएका छन् । केही समूहले मनास्लु हिमाल आरोहण गरे पनि आधिकारिक जानकारी नआइसकेको विभागले जनाएको छ ।
वसन्त ऋतुमा ९८ आरोहण दलका एक हजार ३७५ जनाले सगरमाथासहितका हिमाल आरोहण अनुमति लिएका थिए । जसमध्ये २८९ जनाले सगरमाथा आरोहण गरेका थिए । वर्षका सबै चार याम वसन्त, बर्खा, शरद र हिउँदमा आरोहण हुने गरेको छ ।
प्रकाशित मितिः २०७३ कार्तिक २२
वि.सं.२०७३ कात्तिक २२ सोमवार २०:४२ मा प्रकाशित
