अर्थमन्त्री ज्यु
नमस्कार ।
हिजोआज सामाजिक संजाल पत्रपत्रिका जतासुकै ३३ किलो सुन प्रकरणमा तपाईंको नाम जोडिएको समाचारहरु आउँदा दुःख लाग्यो । यो त असम्भव कुरा, देशको अर्थमन्त्री जस्तो गरिमायुक्त पद धारण गरेका ब्यक्तिले यस्तो लाजमर्दो काम कसरी गर्यो होला जस्तो लाग्यो ! फेरि केही समय पछि तपाईकै स्पष्टिकरण सहित धेरै कुराहरु बाहिर छ्ताछुल्ल भएको छ । हुनत कत्तिको विश्वसनीय छ, त्यो म भन्दा तपाई नै जानकार हुनुहुन्छ । मिडिया र सामाजिक सञ्जाललाई पुष्टि गर्दै तपाईले नै दिनुभएको अभिव्यक्तिले त्यही भन्छ । यदी तपाईकै अभिव्यक्ति सहि मान्ने हो भने अव तपाई कसरी मुलुकको अर्थमन्त्री ?
अर्थमन्त्री ज्यु, तपाईको भिडियो अभिव्यक्ति धेरै पटक प्ले गरेर सुनें । सुन तस्करीमा अरु ठुला माछा र आफु चाहीँ भुरा माछा मात्र हुँ भनेर प्रष्ट रुपमा भन्नु भएको छ । तपाईकै अभिव्यक्ति विभिन्न संचारमाध्यम र सामाजिक संजालमा भाइरल भएको छ । यस्तो कुराले सारा नेपाली लाजले शिर निहुराउन विवश छन्, जो कोहिलार्इ पनि खुशि त बनाएन नै ! सार्वभौम मुलुकको अर्थमन्त्रीको यस्तो अभिव्यक्ति आउला भन्ने कल्पनासम्म पनि गर्न नसकिने कुरो आज तपाईंकै मुखारबिन्दबाट त्यो पनि सार्वजनिक कार्यक्रममा भिडियो खिचाई खिचाई ! धिक्कार छ !
https://www.youtube.com/watch?v=bHJAtGbgkz0
हिजो हामीले तपाई र तपाईको आन्दोलनलाई चन्दा दियौँ, श्रम दियौँ, खाना दियौँ, राज्यका प्रहरी र सेनालार्इ लुकाएर आश्रय दियौ । सम्पती गुमायौँ, आफन्त गुमायौँ, यस्को बदला हामी नेपाली जनताले के पायौं ? दर्द, पीडा अनि दुखार्इ, आज हामीले तपाईँलाई सत्ता, मान सम्मान मात्रै नभएर राष्ट्रको ढुकुटी नै सुम्पिएका छौँ । तर, तपाईहरु जनताको यो त्याग र बलिदानलाई मजाक गरिरहनु भएको छ ! पटक पटक बिश्वास घात गरिरहनुहुन्छ ! यस्तो घटनाले आम जनमानसमा कस्तो सन्देश गएको होला, कहिलेकाँहि सोच्नु भएको छ अर्थमन्त्री ज्यु ?
अर्थमन्त्री ज्यु, जो कोहि मानव भएर यस धर्तिमा हिँड्छ भने उसंग नैतिकता, बिबेक र ईमान हुनुपर्छ । यस्तो कुरा हिजोका अनपढ बुढा पाकाले आफु भन्दा सानालाई प्रशस्त सुनाउँथे । सायद यो कुरा तपाईले पनि विभिन्न भाषण, शिक्षण तथा प्रशिक्षणमा भन्नु गर्नु भएको होला ! अझ देश चलाउने, जनातको सेवा गर्ने मानिससंग अरु भन्दा धेरै गुणा नैतिकताले बाँधिनु पर्छ । तर तपाईले दिएको अभिव्यक्ति सहि हो भने, तपाई अव कति इमान्दार ? आफै मुल्यांकन गर्नुस ।
ख्याल ठट्टा गर्नु भएको हैन भने, साँच्चिकै अभिव्यक्ति दिनु भएको हो भने देशको अर्थमन्त्रीले तस्करीमा हामी भुरा माछा भन्न सुहाउँदो छ ? यदी ३३ किलो सुन प्रकरणमा तपाईले दिनु भएको अभिव्यक्ति सत्य हो भने मैले यस्लाई कुन चाहीँ राष्ट्रवाद मानौं ? यो त सरासर राष्ट्रघात भएन र ? अनि संसारभर तपाईँका त के कुरा नेपाल र नेपाली जनाताकै इज्जत नै कहाँ रह्यो र !
अर्थमन्त्री ज्यु, मेरो सबालमा भन्नुहुन्छ भने म बिगत ५ बर्षदेखि युरोपमा छु । मेरा आफन्त र साथीहरू कोहि पत्रकार कोहि लेखापाल कोहि शिक्षक कोहि कर्मचारी कोहि बैँकर छ्न । कुराकानीको क्रममा अब म नेपाल आउँछु र नेपालमा केही गर्नु पर्यो भन्दा उहाँहरुले कहिल्यै अनुमती दिनुहुन्न । यहाँ नेताहरूले गरेर खान दिन्न भन्नुहुन्छ । बरु हामीलाई पनि युरोप आउने बाताबरण बनाउ भन्नुहुन्छ !
अर्थमन्त्री ज्यु, भाषण दिँदा त युवाहरू फर्कनु पर्छ भन्नुहुन्छ अनि ब्यवहारमा यस्तो देखाउनु हुन्छ । अनि तपाईँहरु जस्ता नेतासंग देशमा शान्ति छाउँछ, रोजगारीको ढोकाहरु प्रशस्त खोलिन्छ्न, महँगी नियन्त्रण हुन्छ, अनि युवाहरू रुँदै बिदेश भासिनु पर्दैन भनेर कसरी भरोसा गर्ने ? अहिले कुनै रहर र चाहना नभै परिवार र पेट पाल्न युबाहरु बिदेशिएको देख्दा कतै नेपाल पनि इथोपिया हुनेत होइन भन्ने चिन्ता लाग्छ । बिद्यार्थी, शिक्षक, पत्रकार, अनि प्रशाशक नै राजनिती र तिनका क्रियाकलाप बाट वाक्क दिक्क भइराखेको बेला अज घाउमा अमिलो छर्के जस्तो दर्द भएको छ यो ३३ किलो सुन प्रकरण अनि तपाईंका भुरा माछावाला अभिव्यक्तिले । संसारर नराम्रो सन्देश लिएर हल्लिएको छ ।
युरोपमा संसार भरिका मानिसहरु बसोबास गर्छ्न । हिजो काम गर्ने ठाउँमा श्रीलंकाली साथिले तिम्रो देशको अर्थमन्त्री पनि सुन तस्कर गर्दो रहेछ है भनेर प्रश्न सोधेको थियो ! अरु नजिकका साथिहरु गलल हाँसे । (अरुलाई पनि यस्तै परेको हुँदो हो ।) मेरो मन अमिलो भयो मैले कुनै उत्तर दिन सकिन, अनुहार निन्याउरो पारेर सुनें मात्र । किनकी तपाई मेरो सार्वभौम मुलुमकको अर्थमन्त्री हो । तपाईसंगै मेरो देशको प्रतिष्ठा गाँसिएको छ, मेरो देशसंगै मेरो स्वाभिमान पनि । तर आज म खोज्दै छु तपाईको अभिव्यक्तिमा म र मेरो देशको स्वाभिमान !
४ माघ २०७३
वि.सं.२०७३ माघ ४ मंगलवार १०:१५ मा प्रकाशित
