काठमाण्डौं । गाउँका साना पर्यटन व्यवसायीहरुलाई वित्तीय पहुँच उपलब्ध गराउने उद्देश्यले एनएमबी माइक्रोफाइनान्स वित्तीय संस्था र युकेएड सक्षम एक्सेस टु फाइनान्सबीच सम्झौता भएको छ।
समझदारी अनुसार एनएमबी माइक्रोफाइनान्सले आगामी दुई बर्षभित्र सात हजार ५२९ व्यक्तिलाई ऋण लगानी गरिने छ। महिला र विपन्न वर्गको ३० प्रतिशतसम्ममा पहुँच विस्तार गर्दै कम्तिमा तीन हजार ५६४ वटा दीगो पर्यटनसँग सम्बन्धित लघु, साना तथा मझौला उद्योगहरु स्थापना गर्ने समझदारीको उद्देश्य हो।
एनएमबीले अब साना आकारका पर्यटन व्यवसायीलाई सहायता प्रदान गर्नको लागि सक्षम उद्यमशील कर्जा नामक नयाँ कर्जा सेवा प्रारम्भ गर्ने एनएमबी माइक्रोफाइनान्सका प्रमुख कार्यकारी अधिकृत तिर्थरत्न कोनाजोले बताए।
यूकेएड सक्षमका टोली प्रमुख बलजित भोहराले एनएमबी माइक्रोफाइनान्सलाई पाँच वटा दुर्गम जिल्लाहरू मनाङ, मुस्ताङ, रुकुम, म्याग्दी र इलाममा वित्तीय सेवाहरूको पहुँच पुर्याउनको लागि सहायता प्रदान गर्ने जानकारी दिए।
पर्यटकीय मार्गमा दुई वटा नयाँ शाखा र पाँच वटा उपशाखाहरू पनि यसै परियोजनाअन्तर्गत खोलिने उनले जानकारी दिए। उनले साझेदारीले पर्यटनको सम्भावना अभिवृद्धि गर्दै ग्रामीण पर्यटन क्षेत्रमा काम गरिरहेका महिला तथा विपन्न वर्गको आयस्तरमा पनि वृद्धि हुने बताए।
.JPG)
२४ फागुन २०७३, ११।००
वि.सं.२०७३ फागुन २४ मंगलवार ११:३२ मा प्रकाशित
