पाँचथर । चौँरी संस्कृतिको विकास गर्दै जैविक विविधताको संरक्षण र जिल्लाका उच्च पहाडी क्षेत्रलाई पर्यटकीय क्षेत्रको रुपमा चिनाउने उद्देश्यले पाँचथरको फालेलुङ गाँउपालिका–४ मा चौँरी महोत्सव भएको छ । सुर्केथाम दुग्ध उत्पादक सहकारी संस्था लिमिटेडको आयोजनामा तीन हजार पाँच सय ६० मिटरको उचाईमा रहेको नेपाल, भारतको पश्चिम बंगाल र सिक्किमको सिमानामा रहेको चारराते भन्ने स्थानमा नयाँ वर्ष २०७४ को अवसर पारेर वैशाख १ गते महोत्सव गरिएको हो ।
राष्टि«य योजना आयोगका सदस्य डा. प्रभु बुढाथोकीबाट महोत्सव उद्घाटन गरिएको थियो । चौँरी संस्कृति लोप हुँदै गएकाले त्यसलाई संरक्षण गर्नका लागि महोत्सवको आयोजना गरिएको सुर्केथाम दुग्ध सहकारी संस्थाका सचिव शिल्पकुमार राईले बताए । महोत्सवमा पाँच सय भन्दा बढी चौँरीहरु भेला गरिएको थियो ।
यस क्षेत्रमा लगभग २० चौँरी गोठहरु रहेका छन् । चरन क्षेत्र व्यवस्थित नभएपछि पछिल्लो समयमा चौँरी गोठहरु घट्दै गएपछि विस्तारै चौँरी संस्कृति हराएकाले संरक्षणका लागि महोत्सवको गरिएको हो ।
महोत्सवबाट त्यहाँको पर्यटकीय सम्भावनालाई अझै माथि उठाउन सहयोग गरेको छ ।
पाँचथरसहित पूर्वी नेपालका ताप्लेजुङ, इलाम, झापा हुँदै काठमाडौंसहित भारतको सिक्किम र दार्जिलिङका बासिन्दा, पर्यटन व्यवसायी र नागरिक गरी करिब एक हजार जनाले महोत्सवको अवलोकन गरेका थिए ।
महोत्सवमा चौँरीको दूधबाट बनाइएका परिकारहरु, चौँरी र भेडाको उनबाट बनेका बस्तुहरु र लेकाली क्षेत्रमा पाइने जडिबुटी तथा कृषिजन्य बस्तुको स्टलहरु राखिएको थियो ।
फोटोः केशवकुमार धौरालीको फेसबुकबाट
प्रकाशित मितिः २०७४ बैशाख ३
वि.सं.२०७४ वैशाख ३ आइतवार १३:०४ मा प्रकाशित
