काठमाडौ । बैंक अफ काठमान्डू (बीओके) ले पाँच वर्षसम्म पनि लाभांश नलिएका लगानीकर्तालाई १ महिनाभित्र सम्पर्क गरेर नगद लाभांश बुझ्न बोलाएको छ । बैंकको साधारणसभा भएको मितिले पाँच वर्ष पुग्दासम्म पनि नलिएको लाभांश बुझ्न बिओकेले लगानीकर्तालाई एक महिनाको समय दिएको हो ।
बिओकेको सेयरसम्बन्धी काम गर्ने सेयर रजिष्ट्रार नबिल इन्भेष्टमेन्ट बैकिङ लिमिटेड नक्सालबाट यो लाभांश लिन पाइने जानकारी गराएको छ । एक महिनाभित्र पनि लाभांश लिन लगानीकर्ता गएनन् भने त्यो पैसा सीधै लगानीकर्ता संरक्षण कोषमा जम्मा हुनेछ । बिओकेमा आर्थिक वर्ष २०५८/५९ देखि २०६७/६८ सम्ममा १ करोड दुई लाख ३२ हजार ३ सय ९४ रुपैयाँ ६२ पैसा थन्किएर बसेको छ ।
बैंकले वैशाख २६ गते सूचना नै जारी गरेर लगानीकर्तालाई नगद लाभांश लिन आउन भनेको हो । सरकारले भने लाभांश नलिएका लगानीकर्ताको लगानी संरक्षण गर्ने उद्देश्यले लगानीकर्ता संरक्षण कोष व्यवस्थापन तथा सञ्चालन कार्यविधि २०७३ बनाएरै लगानीकर्ता संरक्षण कोषमा पाँच वर्ष बितिसक्दा पनि नलिएका पुराना लाभांश जम्मा गर्न थालिएको हो । एक महिनाभित्र पनि बिओकेको नगद लाभांश लिन नजाने लगानीकर्ताको पैसा यसै कोषमा जम्मा हुनेछ । कोषमा सुरक्षित रहने यो लाभांश लिन लगानीकर्ता जहिले गएपनि पाइनेछ ।
प्रकाशित मितिः २०७४ बैशाख २९
वि.सं.२०७४ वैशाख २९ शुक्रवार ०७:४९ मा प्रकाशित
