काठमाडौ । केही बर्षयता एकअर्काका दुश्मन मानिने नायिका रेखा थापा र नायक आर्यन सिग्देललाई दर्शकहरुले सात बर्षपछि एउटै फ्रेममा देख्न पाउने भएका छन् । पहिलो डेब्यू फिल्म नै आर्यनले रेखा थापासँग फिल्म किस्मत गरेका थिए । त्यसपछि दर्शकहरुको यो प्रिय जोडी बन्यो । किस्मत पछि आर्यन र रेखाले हिफाजत, कसले चोर्यो मेरो मन फिल्ममा एकसाथ काम गरे ।
आजभन्दा सात बर्ष अगाडि रिलिज भएको कसले चोर्यो मेरो मन पछि यो जोडीलाई दर्शकहरुले ठूलो पर्दामा हेर्न पाएका थिएनन् । यो फिल्मपछि बजारमा उनीहरुको सम्बन्ध विग्रिएको हल्ला खुबै चल्यो । यति मात्र होइन आर्यन र रेखाले एकअर्काको आलोचना गर्दै पनि हिँडे । अन्ततः सात बर्षपछि सबै दुश्मनी भुलेर रेखा र आर्यनले एउटै फिल्ममा काम गर्ने फाइनल भएको छ ।
बर्ष २०७२ मा रिलिज भएको फिल्म क्लासिक पछि बाहिरी ब्यानरका फिल्ममा काम नगर्ने घोषणा गरेका आर्यन जेष्ठ ४ गतेबाट फ्लोरमा जान लागेको रेखा थापाको होम प्रोडक्शनको फिल्म रुद्र प्रियामा लिड रोलमा फाइनल भएका छन् । फिल्ममा आर्यन रुद्र र रेखाले प्रिया को भूमिका निर्वाह गर्नेछन् ।
विशेषत रेखा अभिनित फिल्ममा अन्य कलाकारहरु ओझेलमा पर्ने गर्छन । आफै हिरोको रुपमा पर्दामा उत्रिने रेखाले रुद्रप्रिया मा आर्यन नै हिरो रहेको बताइन् । ‘रुद्र प्रिया’ लाई ‘माला’ फिल्मका निर्देशक सुदीप भूपाल सिंहले निर्देशन गर्नेछन् ।
प्रकाशित मितिः २०७४ बैशाख २९
वि.सं.२०७४ वैशाख २९ शुक्रवार ०८:४३ मा प्रकाशित