काठमाडौ । स्वेदेशी तथा विदेशी पर्यटकहरुलाई थप सुविधा दिनका लागि काठमाडौ महानगरपालिकाले पर्यटकीय महत्व बोकेका सम्पदामा निःशुल्क इन्टरनेट सुविधा बिस्तार गर्ने भएको छ । काठमाडौ महानगरपालिकाका सहप्रवक्ता नवराज ढकालका अनुसार पर्यटकीय महत्व बोकेका सम्पदामा निःशुल्क इन्टरनेटको सुविधा राख्ने र प्रवेश शुल्कमा तिरेको पैसाले नै पर्यटकहरुले उक्त सुविधाको उपभोग गर्न पाउने भएका छन् ।
तत्कालका लागि स्वयम्भु, हनुमानढोका क्षेत्र, पशुपतिनाथ मन्दिर वरपर इन्टरनेट राखिने तयारी भएको छ । त्यसका लागि महानगरले छिट्टै टेन्डर आह्वान गर्नेछ । साथै कामनपाले बालाजु पार्कमा पनि इन्टरनेट राख्नका लागि बोलपत्र आह्वान गरिसकेको र केही समयमा नै सो काम सुचारु हुने भएको छ ।
एक बर्षअघि रत्नपार्कमा निःशुल्क इन्टनेटको सुविधा राखेपछि पर्यटकको संख्या बढेसँगै महानगरले अन्य पर्यटकीय स्थलमा पनि राख्ने तयारी गरेको हो । यो कार्य अब महानगरको पहिलो प्राथमिकतामा रहको सहप्रवक्ता ढकालले बताए । इन्टरनेट राख्नुपूर्व रत्नपार्कको बार्षिक आम्दानी ५० लाख रुपैया हुने गरेको थियो । इन्टरनेटको सुविधा विस्तारसँगै हाल बार्षिक आम्दानी एक करोड रुपैया हुने गरेको कामनपमको दाबी रहेको छ ।
रत्नपार्कमा इन्टरनेट राखेको एक बर्ष भयो । इन्टरनेटसँगै त्यहाँको सौन्दर्य राम्रो बनाएपछि पर्यटकको आगमनमा वृद्धि भएकाले अन्य स्थानमा पनि यस्तो व्यबस्था गर्न लागिएको बुझिएको छ । पर्यटकहरुको संख्या वृद्धिसँगै त्यस ठाउँको सुन्दरता कायम गर्नका लागि यस्तो कार्य गर्न लागिएको हो ।
प्रकाशित मितिः २०७४ असार १३
वि.सं.२०७४ असार १३ मंगलवार १५:३१ मा प्रकाशित