काठमाडौ । कावेली विकास बैंक लिमिटेड र सिन्धु विकास बैंक लिमिटेडले भदौ १८ गतेदेखि हकप्रद सेयर निष्काशन गर्ने भएका छन् । काबेलीले ५० प्रतिशत अर्थात दुई बराबर एकको अनुपातमा र सिन्धुले १० बराबर आठको अनुपातमा हकप्रद सेयर निष्काशन गर्न लागेका हुन् ।
काबेली विकास बैंकले एक सय रुपैयाँ अंकित मूल्यमा तीन करोड ५० लाख ४८ हजार रुपैयाँ बराबरको तीन लाख ५० हजार आठ सय ८० कित्ता सेयर निष्काशन गर्नेछ । उक्त सेयरमा साउन १९ गतेसम्म कायम सेयरधनीले असोज २१ गतेसम्म आवेदन दिन पाउनेछन् । बैंकको सेयर निष्काशन तथा विक्री प्रबन्धकमा ग्लोबल आईएमई क्यापिटल लिमिटेड रहेको छ ।
ग्लोबल आइएमई क्यापिटल जमल, काबेली विकास बैंकका केन्द्रिय तथा शाखा कार्यालयहरु, ग्लोबल आइएमई बैंकका शाखा कार्यालयहरु वीरगञ्ज, इटहरी, जनकपुर, चितवन, पोखरा, नेपालगंज, बुटवलमा हकप्रदका आवेदन दिन पाइनेछ ।
५० प्रतिशत हकप्रद बिक्रीपश्चात बैंकको चुक्तापूँजी करिब दश करोड ५० लाख रुपैयाँँ पुग्नेछ ।
यस्तै सिन्धु विकास बैंकले एक सय रुपैयाँ अंकित मूल्यमा २० करोड ९७ लाख ५४ हजार रुपैयाँ बराबरको २० लाख ९७ हजार ५ सय ४० कित्ता हकप्रद सेयर निष्काशन गर्दैछ । उक्त सेयरमा भदौ ८ गतेसम्म कायम सेयरधनीले असोज २२ गतेसम्म आवेदन दिन पाउनेछन् । बैंकको सेयर निष्काशन तथा विक्री प्रबन्धकमा एनआईबिएल क्यापिटल मार्केट लिमिटेड रहेको छ ।
एनआईबीएल क्यापिटल, सिन्धु विकास बैंकको प्रधान कार्यालय बाह्रबिस सिन्धुपाल्चोक, कर्पोरेट कार्यालय बनेपा, शाखा कार्यालय बनेपा, मेलम्ची, खाडीचौर, दोललालघाट, मुडे, भकुण्डे, पाँचखाल तथा चरिकोट, बैंकिङ इकाई सिपाघाट काभ्रे र सुकुटे सिन्धुपाल्चोकबाट उक्त हकप्रदका लागि आवेदन दिन सकिनेछ । साथमा नेपाल इन्भेष्टमेन्ट बैंकको शाखा कार्यालय चिप्लेढुँगा पोखरा, विराटनगर, वीरगञ्ज, नारायाणघाट, बुटव, नेपालगञ्ज र धनगढीबाट पनि आवेदन दिन सकिने बताइएको छ ।
हकप्रद सेयर निष्काशनपछि सिन्धुको चुक्तापुँजी ४७ करोड १९ लाख ४६ हजार पाँच सय रुपैयाँ पुग्नेछ ।
प्रकाशित मितिः २०७४ भदौ १
वि.सं.२०७४ भदौ १ बिहीवार १३:३३ मा प्रकाशित
