काठमाडौं । सरकारले बिहीबारबाट ट्रक, मिनी ट्रक, टिप्पर लगायत सबै मालबाहक सवारी साधनलाई काठमाडौंको रिंगरोडमा गुड्न प्रतिवन्ध लगाएको छ ।मालबाहक सवारी साधनलाई बिहान ८ बजेदेखि बेलुकी ७ बजेसम्म रिंगरोडमा मालबाहक सवारी चल्न रोक लगाइएको हो ।
यातायात ब्यवस्था विभागका प्रवक्ता टोकराज पाण्डेका अनुसार पेट्रोल, ग्याँस, पानी लगायत अत्यावश्यक सेवाका सवारीका हकमा भने यो निर्णय लागू हुँदैन ।
उपत्यकामा भित्रिने मालबाहक सवारीका लागि विभिन्न नाकामा पार्किङस्थल तोकिएको छ । अब तोकिएको अवधिभन्दा अघि आउने सवारीले सो पार्किङ काटेर काठमाडौंतर्फ आउन पाउने छैनन् । यदि यो नियम उल्लंघन गरे ५ हजारसम्म जरिवाना लाग्नेछ ।
मालबाहक सवारी पार्कीङ स्थल कहाँ तोकियो
अरनिको तथा वीपी राजमार्गबाट आउने सवारी साधनलाई बनेपामा नै रोकिएको छ । पृथ्वीराजमार्ग हुँदै आउने मालबाहक सवारीलाई नौबिसेमा पार्किङ गराइएको छ । गोदावरीतर्फबाट आउने ट्रकरटिप्परले धापाखेलमा पार्किङ गर्न पाएका छन् ।
त्यस्तै नुवाकोट तर्फबाट आउने मालबाहक सवारीलाई झोर र मुडेमा रोकिएको छ । दक्षिणकाली नाका भएर आउने ट्रक र टिप्परलाई पनि पार्किङ स्थल तोकिएको प्रवक्ता पाण्डेले जानकारी दिए ।
यो व्यवस्था लागू भएपछि काठमाडौँको जामलाई धेरै कम गराउन सकिने अनुमान लगाइएको छ ।
प्रकशित मितिः २०७४ भाद्र १
वि.सं.२०७४ भदौ १ बिहीवार १३:५३ मा प्रकाशित
