काठमाडौं। शिखर इन्स्योरेन्स कम्पनीले बोनस शेयर वितरण मार्फत एक अर्ब रुपैयाँ पूँजी पुर्याउने भएको छ। कम्पनीको १३ औ वार्षिक साधारणसभाबाट २९ प्रतिशत बोनस शेयर दिने प्रस्ताव पारित गरेसँगै बीमा समितिले निर्देशन गरेको पूँजी पुगेको हो।
कम्पनीले २०७० चैत्रमा ५० प्रतिशत अर्थात ८ करोड ७५ लाख रुपैयाँको हकप्रद शेयर निष्कासन गरेको थियो। साथै कम्पनीले २०७२ मंसिरमा प्रतिशेयर ६५० रुपैयाँमा पाँच लाख १० हजार कित्ता एफपिओ निष्कासन गरेको थियो।
बीमा समितिले निर्देशन गरे बमोजिमको पूँजी जुटाउने शिखर इन्स्योरेन्स दोस्रो कम्पनी भएको छ। यस भन्दा अघि हिमालयन जनरल इन्स्योरेन्स कम्पनीले एक अर्ब रुपैयाँ पूँजी पुर्याइसकेको छ।
बोनस शेयर पस्चात कम्पनीको चुक्ता पूँजी एक अर्ब ५ करोड रुपैयाँ पुग्ने छ। कम्पनीको गत आर्थिक वर्षको वित्तीय विवरण हेर्दा कम्पनीले ३७ करोड ५८ लाख रुपैयाँ नाफा गरेको थियो। साथै कम्पनीको जगेडा कोषमा ३० करोड ११ लाख रुपैयाँ जम्मा थियो।
एफपिओ निष्कासनसँगै कम्पनीले आफ्नो पूँजी बलियो बनाउन सफल भएको थियो। साथै हरेक वर्ष बोनस शेयर दिँदै आएको कम्पनीले बीमा समितिले दिएको समय भन्दा अगाडि नै एक अर्ब रुपैयाँ पुर्याउन सफल भएको हो।
कम्पनीले अहिले दिएको २३ करोड ७१ लाख रुपैयाँको तथा बोनस शेयर प्रयोजनार्थ एक करोड २४ लाख रुपैयाँ गत वर्षको मुनाफाबाट पुर्याउन सकेको हो। कम्पनीको हाल संस्थापक शेयरधनी ७० प्रतिशत र सर्वसाधारण तर्फ ३० प्रतिशत रहेका छन्। कम्पनीले २०६१ साल देखि चालु आर्थिक वर्षसम्म आउँदा एक वटा शाखा कार्यालयबाट विस्तार गरी ५४ वटा पुर्याएको छ।
२०७४ पुस १० गते प्रकाशित
वि.सं.२०७४ पुस १० सोमवार १२:४३ मा प्रकाशित
