नुवाकोट। परापुर्व कालमा सामान किनबेच गर्नको लागि उपयुक्त मानिन्थ्यो हाट बजार । पछिल्ले समय शहरीकरणको विकास र विस्तारसंगै हाटबजार लोप हुन थालिसकेको छ । तराइका केही स्थानमा अझै बाँकी रहे पनि पहाडी क्षेत्रमा भने इतिहासका पानामा सिमित रहेको हाट बजार नुवाकोटको जिल्ला सदरमुकाम विदुरमा भने सोमबारे हाटबजार शुरु भएको छ ।
स्थानीय उत्पादनको प्रबद्र्धन गर्नका लागि सदरमुकाम विदुरमा सोमबारे हाटबजारको शुरुआत गरिएको हो । हरेक हप्ताको सोमबार सञ्चालन हुने हाटबजारको आज प्रजिअ वीरेन्द्रकुमार यादवले उद्घाटन गर्दै स्थानीयस्तरमा उत्पादन भएका वस्तुको बजारीकरण तथा उपभोक्ता र उत्पादक किसानबीचको दूरी कम गर्ने सहज उपाय नै हाट बजार भएकाले हाटबजारमा धेरै उत्पादक र उपभोक्ताको सहभागिता रहने वातावरण बनाउनुपर्ने बताए ।
कार्यक्रममा विदुर नगरपालिकाका उपप्रमुख गीता दाहालले किसानले खेतमा उत्पादन गरेका अनाजले बिचौलियाका कारण उचित बजार नपाइरहेका समयमा हाट बजारले सहयोग गर्ने बताइन् । जिल्ला समन्वय समितिका स्थानीय विकास अधिकारी केशरबहादुर पण्डितले जिल्लामा उत्पादन भएका कृषि तथा पशुको नुवाकोटमै पर्याप्त बजार रहकाले यस्ता हाटबजार निरन्तर रुपमा सञ्चालन गर्न सकेमा किसानलाई बढी लाभान्वित हुने बताए ।
नुवाकोट उद्योग वाणिज्य संघका पूर्वअध्यक्ष शरणउत्सुक सापकोटाले हाट बजार सञ्चालनका लागि शुुरुमा सहयोग गर्ने संघसंस्थालाई निरन्तरता दिनका लागि आग्रह गरे । नुवाकोट उद्योग वाणिज्य संघ, जिल्ला समन्वय समिति, जिल्ला कृषि विकास कार्यालय, विदुर नगरपालिका, जिल्ला पशु विकास कार्यलय र सुआहारा कार्यक्रमको संयुक्त आयोजनामा हाटबजार शुरु गरिएको हो ।
हाट बजारमा कृषि उपज दूध, दही, घिउ, च्याउ, काउली, मह, माछामासु र सबै प्रकारका कृषि उत्पादन राखिएको छ । हाट बजार सञ्चालनका लागि विभिन्न निकायको सहयोगमा इलम प्रशिक्षण केन्द्र परिसर विदुरमा रु १७ लाख ९२ हजारमा स्थायी कक्ष निर्माण गरिएको छ आजको हाटबजारमा रु पाँच लाखको कारोवर भएको नुवाकोट उद्योग वाणिज्य संघका प्रवक्ता सन्तोष उप्रेतीले जानकारी दिए ।
२०७४ माघ ८ गते प्रकाशित
वि.सं.२०७४ माघ ८ सोमवार २०:५० मा प्रकाशित
