काठमाडौं । प्रधानमन्त्री केपी शर्मा ओलीले यसै आर्थिक बर्ष देखि व्यापार घाटा घट्ने बताएका छन् ।
नेपाल उद्योग परिसंघले तयार गरेको आर्थिक समृद्धिको मार्गचित्र २०७४ आज बालुवटारमा ग्रहण गर्दै प्रधानमन्त्री ओलीले उक्त कुरा बताएका हुन् । ‘व्यापार घाटा घटाउन सरकारले खास योजना ल्याउछ’ प्रधानमन्त्री ओलीले भने ‘यसका लागि उपभोग्य वस्तुको उत्पादन, उपभोग आदतमा परिवर्तन र निर्यातजन्य वस्तुको उत्पादनमा जोड दिने नीति कार्यन्वयन गर्नु पर्छ ।’
नेपाली उपभोग्य सामानका लागि छिमेकमा ठुलाठुला बजार रहेकोले निर्यातमा समस्या नहुने प्रधानमन्त्री ओलीको भनाइ छ । ‘हामीले उत्पादन गरेका सामग्रीका लागि बजारको अभाव छैन’ प्रधानमन्त्री ओलीले भन्नुभयो ‘कृषिमा आधुनिकीकरण गरेर उच्च उत्पादकत्व बढाउनु पर्दछ ।’
देशलाई समृद्धिको मार्गमा अघि बढाउन सरकार र निजी क्षेत्रको संयुक्त प्रयास आवश्यक पर्ने प्रधानमन्त्री ओलीको भनाइ छ । प्रधानमन्त्री ओलीले अब बन्द र हड्तालको समय सकिएकोले व्यवसायीहरुलाई निर्वाध ढंगले उद्योग व्यवसाायमा लगानी गर्न आग्रह गरेका छन् । सरकारले उद्योग व्यवसाय क्षेत्रमा भएका कानुनी अड्चन हटाउने प्रधानमन्त्रीको प्रतिबद्धता छ ।
कार्यक्रममा अर्थमन्त्री डा.युवराज खतिवडा, उद्योग, वाणिज्य तथा आपूर्ती मन्त्री मातृका यादव, प्रधानमन्त्रीका मूख्य सल्लाहकार विष्णु रिमाल लगायतको उपस्थिती थियो ।
२०७४ चैत १२ गते प्रकाशित
वि.सं.२०७४ चैत १२ सोमवार २१:५७ मा प्रकाशित