काठमाडौ । नेपाल राष्ट्र बैंकले आगामी बैशाख २ गतेदेखी एक वर्षको लागि ३ अर्ब ६७ करोड २६ लाख रुपैयाँ विभिन्न बैंक तथा वित्तीय संस्थाहरुमा मुद्दति निक्षेपमार्फत लगानी गर्ने भएको छ ।
राष्ट्र बैंकले आगामी बैशाख २ गतेदेखि २०७६ वैशाख १ गतेसम्म उक्त रकम जम्मा गर्ने छ । जसका बैंकले क, ख र ग वर्गका बैंक तथा वित्तीय संस्थाहरुसँग प्रस्ताव माग गरेको छ ।
रकम जम्मा गर्नको लागि राष्ट्र बैङ्कले विभिन्न मापदण्ड तोकेको छ । निक्षेपका लागि योग्य हुन कम्पनी सञ्चालनमा आएको कम्तिमा २ वर्ष पुरा भएको, बैंकबाट तोकिएको न्यूनतम पूँजीकोष कायम रहेको वित्तिय संस्था हुनुपर्ने छ ।
यस्तै निष्कृय कर्जा कुल कर्जा सापटको ५ प्रतिशत भन्दा कम भएको, खूद तरल सम्पत्ति स्वदेशी निक्षेपको कम्तीमा २० प्रतिशत भएको हुनुपर्ने, स्वदेशी निक्षेप र प्राथमिक पूँजी अनुपात बैंकले समय समयमा निर्धारण गरेको सीमाभित्र रहेको, निकटतम अघिल्लो आर्थिक वर्षमा बैंक सञ्चालन मुनाफामा रहेको हुनुपर्नेछ ।
त्यसैगरी, रियल स्टेट कर्जा बैंकबाट तोकिएको सीमाभन्दा बढी नभएको, कारबाहीमा परेको भए फुकुवा भएको कम्तीमा ६ महिना पुरा भएको, बैंक तथा वित्तिय संस्था कारबाहीमा परी समस्याग्रस्त घोषणा नभएको, सर्वसाधारणको लागि छुट्टाइएको शेयर जारी गरीसकेको हुनुपर्ने राष्ट्र बैङ्कले जनाएको छ ।
राष्ट्र बैंकले आफ्नो विभिन्न कोषहरुमा रहेको रकम वाणिज्य बैंकहरुमा २ अर्ब ९३ करोड ८१ लाख, विकास बैंकहरुमा ५५ करोड ९ लाख तथा फाइनान्स कम्पनीहरुमा १८ करोड ३६ लाख लगानी गर्ने भएको हो । यसले तरलता संकटमा रहेका बैंकहरुलाई केही राहात मिल्ने भएकोे छ ।
निक्षेप लिन चाहाने बैंकहरुले आवश्यक मापदण्ड पुरा गरेको भएमा आफुले लिन चाहेको रकम र प्रस्तावित व्याजदरसहित चैत्र १५ गते विहीबार दिउसो ३ बजेसम्म आवेदन दिन सक्ने राष्ट्र बैंकले जनाएको छ ।
२०७४ चैत १४ गते प्रकाशित ।
वि.सं.२०७४ चैत १४ बुधवार ०९:२० मा प्रकाशित
