काठमाडौं । रसुवागढी हाईड्रोपावर तथा साञ्जेन जलविद्युत्त कम्पनीको आइतबार बाँडफाँड भएको आईपिओ नपरेको रकम मंगलबारदेखि सम्बन्धीत लगानीकर्ताको खातामा फुकुवा हुने दुबै कम्पनीको सेयर विक्री प्रबन्धकले जानकारी दिएका छन् ।
सेयर बाँडफाँडको अन्तिम नतिजा विवरण सोमबार सिडिएस एण्ड क्लियरिङ्ग मार्फत सम्बन्धित बैंकलाई पठाइने र बैंकहरुले मंगलबारबाट क्रमश आवेदकको खातामा रकम फुकुवा गर्ने रसुवागढीको सेयर विक्री प्रबन्धक सिद्धार्थ क्यापिटले जनाएको छ ।
साञ्जेन जलविद्युत्त कम्पनीको सेयर विक्री प्रबन्धकले पनि लगानीकर्ताको सेयर परेको रकम कट्टा गरि ढिलोमा विहीबारसम्म रोक्का रकम फुकुवा भइसक्ने जानकारी दिएको छ । सिडिएस एण्ड क्लियरिङ्गले चालू आर्थिक बर्षको सुरुवातसँगै प्राथमिक निष्काशनमा आस्वा प्रणाली लागू गरेकोमा फागुन ११ गतेदेखि अनिवार्य सि आश्वा प्रणाली लागू गरेको थियो ।
रसुवागढी र साञ्जेन जलविद्युत्त कम्पनीले फागुन ११ देखि ३० गतेसम्म तथा चैत ५ देखि १३ गतेसम्म सीमित साधारण निष्काशन गरेका थिए । रसुवागढीको आईपिओमा कर्मचारी सञ्चयकोषमा रकम जम्मा गर्ने सञ्चयकर्ताले ५० देखि ८० कित्तासम्म सेयर प्राप्त गरेका छन् भने साञ्जेनमा ३० देखि ४० कित्ता सेयर प्राप्त गरेका छन् ।
संस्थापक सेयर लगानी गर्ने संस्थाका कर्मचारीहरुलार्इ रसुवागढीमा न्यूनतम ५० कित्तादेखि अधिकतम २७० कित्तासम्म बाँडफाँड गरिएको छ भने साञ्जेनमा ५० कित्तादेखि १५० कित्तासम्म सेयर बाँडफाँड गरिएको छ ।
२०७४ चैत १९ गते प्रकाशित
वि.सं.२०७४ चैत १९ सोमवार १५:३२ मा प्रकाशित
