काठमाडौं । सरकारले स्थानीय तहका जनप्रतिनिधि तथा कर्मचारीको विदेश भ्रमणमा अंकुश लगाएको छ । पछिल्लो समय स्थानीय तहबाट नै निर्णय गरेर विदेश भ्रमणमा जाने क्रम चलिहरेको छ । तर, वैदेशिक भ्रमणका नाममा विकृति देखिएको भन्दै संघीय सरकारसँग अनुमति लिएर मात्रै विदेश भ्रमणमा जान निर्देशन जारी भएको छ ।
संघीय मामिला तथा सामान्य प्रशासन मन्त्रालयले मन्त्रीस्तरको निर्णय गर्दै स्थानीय तहहरुलाई अब हुने विदेश भ्रमणको मन्त्रालयबाट स्वीकृत गर्न निर्देशन दिएको हो । अब स्थानीय तहका प्रमुख तथा अन्य पदाधिकारी र कर्मचारीले सरकारसँग स्वीकृति लिएर मात्रै विदेश जान पाउनेछन् ।
यसै गरी मन्त्रालयले यसअघि भएका भ्रमणहरुको सबै जानकारी पनि उपलब्ध गराउन स्थानीय तहलाई भनेको छ, जसमा कुन स्रोतबाट विदेश भ्रमण गरिएको हो भन्ने खुलाउनुपर्नेछ ।
विदेश भ्रमणका नाममा स्थानीय तहको स्रोतको दोहन भएको ठहर मन्त्रालयको छ । विभिन्न स्वार्थ समूहले पनि स्थानीय सरकारलाई विदेश भ्रमणका नाममा प्रयोग गरेको र यसले सुशासनमा असर पर्ने देखिएको मन्त्रालयका एक अधिकारी बताउँछन् ।
मन्त्रालयले स्थानीय तहका पदाधिकारी तथा कर्मचारीको विदेश भ्रमणसम्बन्धी निर्देशिका तयार गरेर मन्त्रिपरिषदमा पेश गरेको छ । निर्देशिकामा पनि संघीय सरकारको अनुमति लिएर मात्रै स्थानीय तहका अधिकारी विदेश जान पाउने प्रस्ताव गरिएको छ ।
[pdf-embedder url=”http://www.arthatantra.com/wp-content/uploads/2018/04/Others-2.pdf” title=”Others (2)”]
२०७४ चैत २१ गते प्रकाशित
वि.सं.२०७४ चैत २१ बुधवार २१:१५ मा प्रकाशित