काठमाडौं । नागरिक लगानी कोषले २२ प्रतिशत बोनस सेयरमा मूल्य समायोजन गर्ने भएको छ । बोनस समायोजनपछि लगानी कोषको सेयर मूल्य प्रतिकित्ता २ हजार २५३.२८ रुपैयाँ कायम भएको छ । बिहीबार कोषको सेयर कारोबार यही मूल्यलाई आधार मानेर खुलेको छ । यसको औसत आधार मूल्य भने २ हजार ७८५.६४ रुपैयाँ छ ।
नागरिक लगानी कोषले वैशाख ७ गते हुने २२ औं वार्षिक साधारण सभामा २२ प्रतिशत बोनस र १.१५ प्रतिशत नगद गरी कुल २३.१५ प्रतिशत लाभांश दिने प्रस्ताव गर्दैछ । यसका लागि कोषले चैत २२ गते देखि सभा हुने दिनसम्म बुक क्लोज गरेको छ ।
नागरिक लगानी कोषको सेयर पुँजी हाल ७४ करोड ३ लाख रुपैयाँ छ । बोनसपछि पुँजी ९० करोड ३१ लाख ५८ हजार २७२ रुपैयाँ पुग्नेछ । चालु आर्थिक वर्षको दोस्रो त्रैमासमा कम्पनीले १८ करोड २१ लाख रुपैयाँ खुद नाफा कमाएको छ । प्रतिसेयर आम्दानी २५ रुपैयाँ रहेको यस संस्थाको प्रतिसेयर नेटवर्थ २२७ रुपैयाँ छ ।
२०७४ चैत २२ गते प्रकाशित
वि.सं.२०७४ चैत २२ बिहीवार १०:४६ मा प्रकाशित
