काठमाडौं । अर्थमन्त्री डा. युवराज खतिवडाले ‘निर्वाचन क्षेत्र पूर्वाधार विकास कार्यक्रम’ खारेज नहुने संकेत गर्नुभएको छ । काठमाडौंमा आयोजित पूर्वबजेटसम्बन्धी कार्यक्रममा डा. खिमलाल देवकोटाले निर्वाचन क्षेत्र पूर्वधार कार्यक्रम बन्द गर्न सुझाउनुभएको थियो । तर, खतिवडाले आफूले चाहेर मात्र यो सम्भव नहुने बताउनुभएको छ ।
उहाँले भन्नुभयो, ‘डा. देवकोटाले निर्वाचन क्षेत्र पूर्वधार कार्यक्रम बन्द गर्नुस् भनेर लेखेर दिएर मैले बन्द गर्न सक्ने भए खुसी त म पनि हुन्थेँ । यसमा गहन छलफल गर्दैछौं ।’ यो हाल ३ करोड छ । तर, २४० निर्वाचन क्षेत्र १६५ मा घटेपछि सांसदहरुले १० करोड बनाउन माग गरेका छन् ।
अर्थमन्त्री खतिवडाले नयाँ बजेटले सबै क्षेत्रलाई समेटने बताउनुभयो । उहाँले भन्नुभयो, ‘कृतिम तथ्यांकहरु राखेर बजेट बनाउँदिनँ । संसददेखि जनतासम्म सन्देश जानु पर्ने भएकाले ट्याक्टफूल पनि हुन्छ ।’
कार्यक्रममा नेपाल उद्योग परिसंघका अध्यक्ष डा. हरिभक्त शर्माले नयाँ बजेट उत्पादनशील क्षेत्रमा लगानी बढाउने गरी ल्याउनपर्ने बताउनुभयो। आयातित बस्तुहरुको बढदो आकर्षणलाई घटाउँदै लैजानुपर्नेमा उहाँको जोड छ ।
२०७५ बैशाख १३ गते प्रकाशित
वि.सं.२०७५ वैशाख १३ बिहीवार १६:५९ मा प्रकाशित
