काठमाडौं । धितोपत्र बोर्डले एनएमबी बैंकले ३ अर्ब मूल्यको ऋणपत्र निश्कासनको स्वीकृति प्रदान गरेको छ । बैंकले १ हजार रुपैयाँ दरको ३० लाख कित्ता ‘१० प्रतिशत एनएमबि डिबेन्चर २०८५’ जारी गर्न लागेको हो । यसमध्ये १२ लाख कित्तामा सर्वसाधारणले लगानी गर्न सक्नेछन् । बाँकी १८ लाख कित्ता भने बैंकले आफ्नै पहलमा अन्य संघसंस्थालाई बिक्री गर्नेछ ।
ऋणपत्रको निश्कासन तथा बिक्री प्रबन्धकमा सिद्धार्थ क्यापिटल लिमीटेड रहेको छ।ऋणपत्रले ‘इक्रा एनपी एलए माइनस’ रेटिङ पाएको छ । यो रेटिङले न्यून कर्जा जोखिम र लगानीका लागि सुरक्षित रहेको जनाउँछ । एनएमबि बैंकले यो ऋणपत्रमा वार्षिक १० प्रतिशत ब्याजदर दिनेछ ।
एनएमबि बैंकले हालै १० प्रतिशत बोनस सेयर र २० प्रतिशत नगद लाभांश दिएको थियो । बोनस सेयर वितरणपछि बैंकले पुँजी ९ अर्ब ६१ करोड ८१ लाख ६२ हजार रुपैयाँ पुर्याएको छ । बैंकले यसअघि ५० करोडको ऋणपत्र निश्कासन गरिसकेको छ ।
२०७५ फागुन १६ गते प्रकाशित
वि.सं.२०७५ फागुन १६ बिहीवार १३:४८ मा प्रकाशित
