काठमाडौं । धादिङ जिल्लाको बेनिघाटमा आज (आइतबार) बिहान बस र दुईवटा माइक्रोबस एकआपसमा ठोक्किएर दुर्घटना हुँदा दुईजनाको मृत्यु भएको छ। दुर्घटनामा परि ३० जना घाइते भएका छन् । घाइतेमध्ये ६ जनाको अवस्था गम्भीर रहेको प्रहरिले जनाएको छ ।
दुर्घटनामा परि घटनास्थलमै ज्यान गुमाउनेमा महादेवस्थान–८ का २७ वर्षीय श्यामकुमार श्रेष्ठ रहेका छन् भने अर्का एकजना महिलाको उपचारका लागि अस्पताल लैजाने क्रममा मृत्यु भएको जिल्ला प्रहरी कार्यालय धादिङका प्रहरी नायव उपरीक्षक (डिएसपी) रुपक खड्काले जानकारी दिएका छन्। मेृतक महिलाको नाम खुल्न सकेको छैन। घाइते १८ जनालाई उपचारका लागि काठमाडौं पठाइएको छ भने सातजनाको गजुरी अस्पतालमा र दुईजनाको चरौदी अस्पतालमा उपचार भइरहेको छ। तीनजना सामान्य उपचारपछि डिस्चार्ज भएको प्रहरीले जनाएको छ ।
काठमाडौंबाट चितवनतर्फ आउँदै गरेको लु १ ख ९०७९ नम्बरको बस , चितवनबाट काठमाडौं जाँदै गरेको बा ३ ख १००४ र बा २ ख ४५६७ नम्बरको माइक्रो पौने ११ बजे रोराङ गाउँपालिका–७, कृष्णभीर भन्ने ठाउँमा एकआपसमा ठोक्किएर दुर्घटना भएको थियो ।
प्रहरीका अनुसार माइक्रोबसले बसलाई ओभरटेक गर्न खोज्दा विपरीत दिशाबाट आइरहेको अर्को माइक्रो बससँग ठोक्किँदा दुर्घटना भएको हो । बा ३ ख १००४ नम्बरका माइक्रो बस चालकलाई नियन्त्रणमा लिइएको प्रहरीले जनाएको छ ।
२०७६ असार १५ गते प्रकाशित
वि.सं.२०७६ असार १५ आइतवार १५:५२ मा प्रकाशित
