काठमाडौं । विद्यालय क्षेत्र सुधार कार्यक्रम तथा मानव संशोधन विकास परियोजना कार्यान्वयन गर्न जापान सरकारद्धारा नेपाल सरकारलाई रु ६३ करोड ९९ लाख अनुदान प्राप्त हुने भएको छ ।
आज अर्थ मन्त्रालयमा आयोजित अनुदान सहायतासम्बन्धी कार्यक्रमममा नेपालका लागि जापानका राजदूत मासामिची साइगो र अर्थ सचिव राजन खनालले सम्झौतापत्रमा हस्ताक्षर गरेका छन् ।
सम्झौता कार्यान्वयन गर्ने सम्बन्धी अर्को सम्झौतापत्रमा अर्थ मन्त्रालयका सहसचिव श्रीकृष्ण नेपाल र जापानी सहयोग नियोग (जाइका) का प्रमुख प्रतिनिधि युमिको आशाकुमाले हस्ताक्षर गरेका छन् ।
साथै राजदूत साइगोले दिगो विकासका लक्ष्य हासिल गर्ने तथा ‘समृद्ध नेपाल, खुशी नेपाली’ परिकल्पना साकार पार्ने वर्तमान सरकारको उद्देश्य हासिलमा सानै भए पनि सहयोग गर्न पाएकामा जापान गौरवान्वित भएको बताए । नेपालको सामाजिक–आर्थिक विकासका निम्ति जापानबाट निरन्तर सहयोग प्राप्त भएकामा अर्थ सचिव खनालले हार्दिक आभार व्यक्त गरेका थिए ।
२०७६ साउन ८ गते प्रकाशित
वि.सं.२०७६ साउन ८ बुधवार १३:१६ मा प्रकाशित