ताप्लेजुङ । ताप्लेजुङको फुङलिङ नगरपालिकाले जुत्ता पालिस गर्नेदेखि ठेलामा चटपटे बेच्नेलाई समेत करको दायरामा ल्याएको छ ।
नगरपालिकाले चालू आर्थिक वर्ष २०७६/७७ का लागि प्रकाशित गरेको ‘नगर राजपत्र’ मा उल्लेख भएअनुसार जुत्तामा पालिस गर्नेले २० रुपैयाँ र ठेलामा चटपटे बिक्री गर्नेलाई ७५ रुपैयाँ तोकिएको छ ।
अनसुची–८ (दफा ९ सँग सम्बन्धित) बहाल विटौरी करअन्तर्गत तोक्मेडाँडामा शनिबार र मंगलबार लाग्ने हटियामा १ जोडी परेवा बिक्री गरेवापत १५ रुपैयाँ कर तोकिएको छ । भूइँमा सामान विच्छ्याएर बेचेवापत पनि २० रुपैयाँ तोकिएको छ । डोकोमा फलफूल तथा सागसब्जी बेच्नेले प्रतिडोको २० रुपैयाँ बुझाउनुपर्नेछ । नगरले बनाएको ब्लकमा राखेर बिक्री गर्नेलाई एक सय रुपैयाँ तोकेको छ । रागाको मासु बेचेवापत प्रतिगोटा २ सय र सुँगुरको १ सय ५० रुपैयाँ कर लाग्नेछ ।
नगरपालिका क्षेत्रमा अस्थायी रूपमा घुम्ती व्यवसाय गर्नेलाई पनि कर तोकेको छ । १ गाडी सामान बिक्रीवापत २ हजार तथा घुम्ती व्यापार प्रतिदिन (पोके व्यापारी) लाई २ सय, पक्की घर ६ सय र टाटीले बनेको टिन वा फुसको छाना भएका घरधनीले एक सय रुपैयाँ तिर्नुपर्नेछ ।
यसैगरी भूमि कर (मालपोत) अन्तर्गत मुख्य बजार, सहायक बजार र अन्य क्षेत्र गरी वर्गीकरण गरी कर तोकिएको छ । मुख्य बजार क्षेत्रमा ४ आनासम्म ५० रुपैयाँ र १ रोपनीमाथिका प्रतिरोपनी ६० रुपैयाँ तोकिएको छ ।
धनीपूर्जामा अलैंचीबारी उल्लेख गरिएको भए प्रतिरोपनी २५ रुपैयाँ उल्लेख छ । आर्थिक वर्ष २०७५(७६ को सम्मको राजस्व पुस मसान्तसम्म तिर्न आएमा जरिवाना छुट हुने अन्यथा प्रतिवर्ष १० प्रतिशतका दरले वक्यौता रकममा जरिवाना लाग्ने उल्लेख गरिएको छ ।
व्यवसाय करअन्तर्गत ‘क’ श्रेणीका होटललाई १० हजार र ‘ङ’ श्रेणीका लागि १ हजार ५ सय तोकिएको छ । यद्यपी होटल व्यवसायी, प्रशासन र घरेलु तथा साना उद्योग कार्यालयको रोहवरमा मापदण्ड बनाएर व्यवसाय कर असुलको व्यवस्थापन गर्ने जनाएको छ । जीवजन्तु करअन्तर्गत कुखुरा र हाँस निर्यात गर्दा प्रतिगोटा १० रुपैयाँ, गाई, भैंसी, चौरी र घोडा निर्यातवापत प्रतिगोटा २ सय ५० रुपैयाँ तोकिएको छ ।
त्यस्तै मुख्य क्षेत्र अर्थात मेची राजमार्ग दायाँ बायाँमा होर्डङ वोर्ड राखेवापत ८० रुपैयाँ लाग्नेछ । धरौटी भने ७ सय तोकिएको छ । व्यापारिक प्रयोजनबाहेकका लागि तुल ब्यानर राख्न अनुमति शुल्क प्रतिगोटा एक सय रुपैयाँ लाग्नेछ । बैंकका लागि ऋण सिफारिस दस्तुर १० लाखसम्म १ हजार १ सय र २ करोडसम्म ७ हजार ७ सय तोकिएको छ । चार किल्ला र घरबाटो प्रमाणित दस्तुरवापत ४ आनासम्म १ हजार ४ सय ३० रुपैयाँ र ५ रोपनीदेखि माथि जतिसुकै भए पनि २ हजार ७ सय ५० रुपैयाँ तोकिएको छ ।
वंशजको नागरिकतासम्बन्धी सिफारिस निःशुल्क गरिएको छ । अंगिकृत नागरिकता सिफारिस ७ सय ५० रुपैयाँ र नागरिकताको प्रतिलिपी, सर्ज्मिन मुचुल्का सनाखत, नाता प्रमाणित र व्यक्तिगत घटना दर्ता (३५ दिनपछि दर्ता भएमा) सिफारिसको समान तीन सय तोकिएको छ । पति पत्नीको सम्बन्धविच्छेदको सिफारिसको एक हजार तोकिएको छ ।
फुङलिङ नगरपालिकाको अर्थसम्बन्धी प्रस्तावलाई कार्यान्वयन गर्न बनेको ऐन, २०७६ बमोजिम चालू वर्षको साउन १ गतेदेखि लागू भएको हो । नगरपालिका उपप्रमूख बमबहादुर भट्टराईले कर विगत वर्षकै निरन्तरता भएको बताए ।
२०७६ साउन २६ गते प्रकाशित
वि.सं.२०७६ साउन २६ आइतवार १४:४१ मा प्रकाशित
