काठमाडौं । नेपाल धितोपत्र बोर्डका अध्यक्ष रेवतबहादुर कार्कीले पछिल्लो समय पुँजी बजार सुधारका लागि नियामक निकायले उल्लेख्य काम गरेको बताएका छन् । आज बुधबार प्रतिनिधिसभा अन्तर्गतको अर्थ समिति बैठकमा बोल्दै पछिल्लो समय पुँजी बजारमा कायापलट नै हुने गरी परिवर्तन आएको उनले दाबी गरेका छन् ।
समितिको बैठकमा बोल्दै उनले धितोपत्र बजार सुधारमा चौतर्फी काम भएको दाबी गरेका छन् । ‘बजार सुधारका लागि एकतर्फी होइन चौतर्फी काम भएको छ । प्राथमिक बजार, दोस्रो बजार र नियामक निकाय भित्रै पनि सुधार गरेका छौं ।’ बजार सुधारकै क्रममा बैंकलाई ब्रोकर लाइसेन्स दिने कामले गति लिएको समेत अध्यक्ष कार्कीले बताए । हितग्राही (डिम्याट) खाता र आस्वा प्रणालीको सुरु भएसँगै पुँजी बजारमा विद्यमान बोरे प्रणालीको अन्त्य भएको उनले बताएका छन् । कारोबारका लागि योग्य ९०५ भन्दा बढी सेयर डिम्याट भइसकेको समेत अध्यक्ष कार्कीले जानकारी दिएका छन् ।
बैंक ब्याजदर र सेयर बजारको उल्टो सम्बन्ध हुने भन्दै बैंक तथा वित्तीय संस्थाले निक्षेपमा आकर्षक ब्याज दिइरहेका तथा बैंकिङ प्रणालीमा लगानी योग्य रकम अपेक्षा अनुसार सहज नहुँदा सेयर बजार प्रभावित भइरहेको उनको भनाई छ । सेयर बजार सुधारका लागि बैंक ब्याजदर घटाउनुपर्ने उनको तर्क छ ।
सेयर बजारमा सुधार ल्याउन बैंकको ब्याजदर घट्नैपर्छ । त्यसपछि मात्र लगानीकर्ताको आकर्षण पुँजी बजारमा हुन्छ ।’ अर्थ समितिमा उपस्थित कार्की पुँजी बजार र बैंकको सहायक कम्पनीलाई ब्रोकर लाइसेन्स दिने लगायतका विषयमा छलफल गर्न बैठकमा उपस्थित भएका थिए।
२०७६ साउन २९ गते प्रकाशित
वि.सं.२०७६ साउन २९ बुधवार १४:०३ मा प्रकाशित
