पाँचथर । पाँचथरका स्थानीय तहमा ७ करोड रुपैयाँभन्दा वढी रकम बेरुजू देखिएको छ । जिल्लाका आठ स्थानीय तहमा ७ करोड ३१ लाख ९९ हजार बेरुजू रहेका छन ।
महालेखापरीक्षक कार्यालयको वार्षिक प्रतिवेदन अनुसार आर्थिक वर्ष २०७४÷०७५ मा पाँचथरका स्थानीय तहले यति ठूलो रकम फर्यौैट गर्न नसकेको हो ।
यो पाँचथरका स्थानीय तहहरुमा विनियोजित कुल रकमको ३ दशमलव ९३ प्रतिशत हो । आठ स्थानीय तहमध्ये सबैभन्दा धेरै बैरुजू कुम्मायक गाउँपालिकाको रहेको छ । कुम्मायक गाउँपालिकाको २ करोड १८ लाख ३१ हजार बेरुजू रहेको छ ।
यति धेरै रकम बेरुजू हुनुमा प्राविधिक कारण रहेको कुम्मायक गाउँपालिकाका प्रशासकीय अधिकृत कमलप्रसाद भट्टराइले जानकारी दिनुभयो ।
उहाँले बेरुजू देखिएको रकममध्ये १ करोड ३० लाख फर्यौट भएको तर प्राविधिक कारण लेखापरिक्षण प्रतिवेदनमा समिट गर्न नसकिएको बताउनुभयो ।
कुम्मायकपछि मिक्लाजोङ गाउँपालिकाकोे १ करोड ३९ लाख १८ हजार, फिदिम नगरपालिकाको ८४ लाख २७ हजार, फालेलुङ गाउँपालिकाको ३८ लाख ९४ हजार, फाल्गुनन्द गाउँपालिकाको ४३ लाख ३१ हजार रहेको छ ।
त्यस्तै तुम्वेवा गाउँपालिकाको ९४ लाख ६३ हजार र याङवरक गाउँपालिकाको ५७ लाख २४ हजार रकम बेरुजू रहेको छ । सबै भन्दा कम बेरुजू फालेलुङ गाउँपालिकाको ३८ लाख ९४ हजार रहेको छ ।
२०७६ भदौ २ गते प्रकाशित
वि.सं.२०७६ भदौ २ सोमवार १२:५० मा प्रकाशित
