रुकुमपूर्व । जलवायु अनुकूलन तथा ज्ञान व्यवस्थापन कार्यक्रम अन्तर्गत कृषकलाई बाख्रा वितरण गरिएको बताइएको छ । युनाइटेड मिसन टु नेपाल रुकुम क्लस्टर (युएमएन) को आर्थिक सहयोग र नेपाल मगर समाज सेवा तथा सूचना केन्द्र (मिक नेपाल) को प्रविधिक सहयोगमा भुमे गाउँपालिका–२ गाबाङका किसानलाई गोठ निर्माणसँगै उन्नतजातका बाख्रा वितरण गरिएको हो ।
गाबाङका सात घरपरिवारलाई व्यावसायिक बनाउन गोठ निर्माणसँगै छ/छ वटा उन्नतजातका बाख्रा वितरण गरिएको हो । गाबाङका विपन्न परिवार, महिला, व्यवसाय गर्न इच्छुक तथा बाख्रापालन व्यवसाय सम्बन्धी तालीम लिएका सात घरपरिवार छनोट गरी प्रत्येक घरपरिवारलाई गोठ निर्माण गरिदिएको छ । एक घरलाई रु एक लाख चार हजार बराबरको लगानी गरिएको छ ।
उनीहरुको आयआर्जनलाई बढाई जीवनयापनमा सहज बनाउने उद्देश्यले अनुदानमा गोठ निर्माण सहित बाख्रा वितरण गरिएको मिक नेपालका अध्यक्ष भिउमान घर्तीले बताउनुभयो । एक महीनाअघि नै ४० सम्म बाख्रा अटाउन सक्ने गोठ तयार बनाइसकेको मिक नेपालले जनाएको छ । प्रत्येक गोठ निर्माणका लागि रु ५४ हजार र बाख्रा खरीदका लागि रु ५० हजार खर्च गरेको बताइएको छ ।
अनुदानमा गोठ निर्माणसँगै बाख्रा पाएपछि कृषक हर्षित भएका छन् । “अनुदानमा गोठ र बाख्रा पायौँ, अब व्यावसायिक रुपमा बाख्रा पाल्छौँ र यसैबाट जीविकोपार्जन गर्छौँ ।” स्थानीय ज्योति बुढाले भन्नुभयो । आफूहरुमाथि गरिएको यो लगानीलाई खेर जान नदिने उनीहरुले बताएका छन् । जिल्लामा खसीबोकाको मासुको माग बढ्दै गइरहेका बेला बाख्रापालन व्यवसायबाट राम्रो लाभ लिन सकिने मिक नेपालका अध्यक्ष घर्तीले बताउनुभयो ।
२०७६ भदौ ०३ गते प्रकाशित
वि.सं.२०७६ भदौ ४ बुधवार १०:३३ मा प्रकाशित
