काठमाडौं । शेयर बजारमा एक सातामा डेढ अर्ब रुपैयाँ बराबरको मात्र शेयर कारोबार भएको छ ।
पाँचै दिन खुलेको यस साताको बजारमा कारोबार रकम अघिल्लो सातको तुलनामा २४ करोड १८ लाखले घटेर १ अर्ब ५४ करोड रुपैयाँमा नै सीमित भएको हो ।
यसै साता दुई कम्पनीको ४६ लाख २० हजार कित्ता शेयर सूचीकरण भएपनि नेप्से परिसूचकसँगै कम्पनीको शेयरमूल्य घट्दा बजार पूँजीकरण भने झनै घटेको छ ।
यस साता सबैको लघुवित्तको १६ लाख ५० हजार कित्ता साधारण शेयर र गुँरास लाइफ इन्स्योरेन्सको २९ लाख ७० हजार कित्ता हकप्रद शेयर कारोबारका लागि नेप्सेमा सूचीकरण भयो ।
अघिल्लो साता १५ खर्ब ५१ अर्ब रुपैयाँ रहेको बजार पूँजीकरण ११ अर्ब ७९ करोडले घटेर १५ खर्ब ३९ अर्ब रुपैयाँमा झरेको हो । कूल बजार पूँजीकरणको पहिलो स्थानमा नेपाल दुरसञ्चार कम्पनी एक खर्ब एक अर्ब १० करोड सहित पहिलो नम्बरमा रहेको छ ।
नबिल बैंक ६९ अर्ब ९६ करोड, नेपाल इन्भेष्टमेन्ट बैंक ५९ अर्ब ९७ करोड, एभरेष्ट बैंक ५२ अर्ब ९ करोड, स्ट्याण्डर्ड चार्टड बैंक ५१ अर्ब ११ करोड, हिमालयन बैंक ४७ अर्ब ७१ करोड, नेपाल लाईफ ४७ अर्ब ४८ करोड एनआईसी एशिया ४० अर्ब ११ करोड, कृषि विकास बैंक ३८ अर्ब ५८ करोड र नेपाल एबिआई बैंक ३७ अर्ब ६० करोड पूँजीकरण सहित सातको शिर्ष दश ठूलो पूँजीकरण भएको कम्पनीमा समेटिएका छन ।
सातामा नेप्से परिसूचक पनि ११ अंकले तल झरेको छ । अघिल्लो साता १२२२.०४ बिन्दुमा रहेको नेप्से सूचक १०.९७ अंकले घटेर १२१३.०७ बिन्दुमा झरेको हो ।
यस साता सोल्टी होटलको सबैभन्दा धेरै १० करोड ४९ लाख रुपैयाँ बराबरको शेयर कारोबार भयो भने एनआइसी एशिया बैंकको ९ करोड १४ लाख रुपैयाँ बराबरको शेयर कारोबार भएको छ ।
त्यस्तै रसुवागढी हाइड्रो पावर, कृषि विकास बैंक र नेपाल इन्भेष्टमेन्ट बैंक उच्च कारोबार गर्ने शिर्ष कम्पनीको क्रमश तेस्रो, चौथो र पाँचौ स्थानमा छन । यस साता उच्च कारोबार गर्ने शिर्ष १० कम्पनीमा ७ वटा वाणिज्य बैंक अटाएका छन ।
२०७६ भदौ ६ गते प्रकाशित
वि.सं.२०७६ भदौ ६ शुक्रवार १६:५० मा प्रकाशित