काठमाडौं । आन्तरिक राजस्व विभागले गत आर्थिक वर्ष २०७५/७६ सम्म सबैखाले करदाताको संख्या २१ लाख ७३ हजार ९०९ पुगेको जनाएको छ ।
गत आवमा ३ लाख ८४ हजार १६२ करदाता बढेको विभागको तथ्यांक छ । विभागका अनुसार गत आवमा व्यक्तिगत स्थायी लेखा नम्बर (पान) लिनेको संख्या अत्यधिक बढेको छ ।
गत असार मसान्तसम्म व्यक्तिगत करदाताको कुल संख्या ९ लाख ९३ हजार ९७९ पुगेको विभागले जनाएको छ ।
व्यक्तिगत करदातातर्फ गत आवमा २ लाख २७ हजार ३३२ जना थपिएका छन । आव २०७४/७५ मा ७९ हजार ९७३ जनाले व्यक्तिगत पान लिएका थिए ।
त्यस्तै, व्यावसायिक पान लिनेको संख्या पनि अघिल्लो आवको तुलनामा गत आवमा बढेको छ । अघिल्लो आवमा १ लाख १६ हजार ९७ ले व्यावसायिक पान लिएका थिए भने गत आवमा १ लाख ५७ हजार ८२९ ले व्यावसायिक पान लिएका छन ।
गत आवमा मूल्य अभिवृद्धि कर (भ्याट) र अन्तःशुल्कमा दर्ता हुनेको संख्या बढे पनि यो वृद्धि अघिल्लो आवको तुलनामा कम छ । अघिल्लो आवमा भ्याटतर्फ २० हजार ९३९ करदाता थपिएकोमा गत आवमा १९ हजार ५६२ मात्र थपिएका छन ।
यस्तै, अन्तःशुल्कतर्फ अघिल्लो आवमा थप ५९ हजार १४७ करदाता दर्ता भएकोमा गत आवमा १३ हजार २९६ मात्र थपिएका छन । -आर्थिक अभियानमा समाचार छ ।
२०७६ भदौ १२ गते प्रकाशित
वि.सं.२०७६ भदौ १२ बिहीवार ०८:३४ मा प्रकाशित
