ललितपुर । शान्ति सुरक्षाका लागि प्रहरी कार्यालय पुर्याएका ज्ञानबहादुर शाही उर्फ ज्ञानेन्द्र शाहीले उल्टै प्रहरीलाई दुव्र्यवहार गरेपछि प्रहरीले उनीविरुद्ध मुद्दा चलाउने भएको छ ।
ललितपुरको पुल्चोकस्थित एक क्याफेमा पत्रकार सम्मेलन आयोजना स्थलमा हात हालाहालको स्थिति भएपछि सुरक्षाका लागि प्रहरी कार्यालय पुर्याएका शाहीले प्रहरीलाई नै अभद्र व्यवहार गरेको भन्दै मुद्दा चलाउन लागेको हो ।
उनीविरुद्ध मुद्दा चलाउन अनुसन्धानका लागि उनलाई म्याद लिने तयारी गरेको छ । उनलाई दुव्र्यवहारको मुद्दा चलाउन लागेको ललितपुर प्रहरीका एसएसपी टेकप्रसाद राईले जानकारी दिए ।
पत्रकार सम्मेलनमा युटुबर र विद्यार्थीहरुले उनलाई प्रश्नको वर्षा गरेपछि भनाभन भएको थियो । विद्यार्थी र युटुबरहरुले कुटपिट लागेपछि प्रहरीले शाहीलाई सुरक्षाका लागि भन्दै प्रहरी कार्यालय लगेको थियो ।
प्रहरी कार्यालयमा लगेपछि उनले आफूलाई असहज भएको भन्दै अस्पताल लैजान भनेका थिए । प्रहरीले अस्पतालमा लगेर उपचार समेत गराएका थिए ।
शनिवार साँझ नेपालगन्ज विमानस्थलमा संस्कृति, पर्यटन तथा नागरिक उड्डयनमन्त्री योगेश भट्टराईमाथि दुर्व्यवहार गरेका शाहीले मन्त्रीले ढाटेको भन्दै पत्रकार सम्मेलन गरेका थिए ।
पत्रकार सम्मेलनमा युटुबर र विद्यार्थीहरुले उनलाई अभियान गर्ने आर्थिक स्रोत के हो ? भनेर प्रश्न गरेका थिए ।त्यस्तै उनलाई अभियानको नाममा गणतन्त्र विरोधी अभियान गर्न कसले उक्साएको छ ? भनेर पनि सोधेका थिए ।
२०७६ भदौ ३० गते प्रकाशित
वि.सं.२०७६ भदौ ३० सोमवार १०:४९ मा प्रकाशित
