काठमाडौं । नेपाल राष्ट्र बैंकले एक हजार रुपैयाँको नोटमा जुम्ल्याहा हात्ती राख्ने भएको छ ।अर्थ मन्त्रालयबाट जुम्ल्याहा हात्ती राख्ने प्रस्ताव स्वीकृत भई छपाइको प्रक्रियामा पुगेको राष्ट्र बैंकले जनाएको छ ।
हाल प्रचलनमा रहेको हजारको नोटमा एउटा मात्रै हात्तीको तस्बिर अंकित छ । चितवनका जुम्ल्याहा हात्ती राम/लक्ष्मणको तस्बिर अंकित नोटको डिजाइन तयार भइसकेको छ ।
नयाँ नोट छपाइको टेन्डर चिनियाँ कम्पनीले पाइसकेको राष्ट्र बैंकले जनाएको छ । कम्पनीसँग जुम्ल्याहा हात्ती अंकित नयाँ नोट छपाइको लागि केही दिनमै सम्झौता हुने राष्ट्र बैंकको भनाइ छ ।
छपाइको सम्झौता भएको करिब १ वर्षमा नयाँ नोट बजारमा आउनेछ । २०७७ को दसैंसम्ममा जुम्ल्याहा हात्ती अंकित १ हजारको नयाँ नोट बजारमा आउने अनुमान गरिएको छ ।
चितवन राष्ट्रिय निकुन्जमा भएका राम र लक्ष्मण ८ वर्षका भए । हाल छपाइको तयारीमा रहेको हजारको नोट छाप्दा प्रतिनोट ३ रुपैयाँ ३७ पैसा खर्च लाग्ने भएको राष्ट्र बैंकका प्रवक्ता लक्ष्मीप्रपन्न निरौलाले जानकारी दिनुभयो ।
जुम्ल्याहा हात्ती अंकित ३१ करोड थान नोट छाप्नुपर्ने गरी सम्झौता हुने बताइएको छ ।
२०७६ असोज ०५ गते प्रकाशित
वि.सं.२०७६ असोज ५ आइतवार १५:४२ मा प्रकाशित
