काठमाडौं । शिवश्री हाइड्रोपावर कम्पनीले आजदेखि सर्वसाधारणका लागि आईपीओ विक्री गर्ने भएको छ । कम्पनीले ३३ लाख ५१ हजार १४० कित्ता शेयर विक्री गर्न लागेको हो ।
आयोजना प्रभावित स्थानियलाई विक्री हुन नसकेको ११ लाख ३६ हजार ५४० कित्ता शेयर समेत जोडेर कम्पनीले सर्वसाधारणलाई विक्री गर्न लागेको छ ।
आईपीओ विक्री गर्न कम्पनीले नेपाल धितोपत्र बोर्डबाट असोज १ गते अनुमति पाएको थियो । यो शेयरको मूल्य प्रतिशेयर रू. १०० तोकिएको छ ।
तोके बमोजिमको आवेदन परे छिटोमा असोज २४ गतेभित्र आवेदन खुला रहनेछ भने त्यस अवधिमा माग बमोजिम आवेदन नपरे कात्तिक १५ गतेसम्म आवेदन दिन सकिनेछ ।
यस आईपीओ खरीदका लागि न्यूनतम १० कित्ता र अधिकतम १० लाख कित्तासम्म आवेदन दिन सकिन्छ । आईपीओ खरीद गर्न चाहनेले सि–आस्बा सेवामा सहभागि सम्पूर्ण बैंक तथा वित्तीय संस्थाबाट आवेदन दिन सक्नेछन ।
साथै मेरो शेयर एपमार्फत पनि आवेदन दिन सकिने व्यवस्था छ । कम्पनीले सर्वसाधारणको लागि जारी गर्न लागेको यस आईपीओलाई केयर रेटिङ नेपालले ग्रेड ४ रेटिङ प्रदान गरेको छ । ग्रेड ४ रेटिङले कम्पनीको आधारभूत पक्ष औषतभन्दा कमजोर रहेको देखाउँछ ।
आईपीओ विक्री प्रबन्धकमा सिद्धार्थ क्यापिटल लिमिटेड रहेको छ । यस कम्पनीले सिन्धुपाल्चोक जिल्लामा २२ दशमलव २ मेगावाट क्षमताको माथिल्लो जलविद्युत आयोजना निर्माण गरिरहेको छ ।
यस आयोजनाको कुल लागत रू. ४ अर्ब ९८ करोड ५९ लाख छ भने प्रति मेगाावाट लागत रू. २२ करोड ४५ लाख ९४ हजार छ ।
हाल रू. १ अर्ब १४ करोड १२ लाख ८६ हजार चुक्तापूँजी रहेको यस कम्पनीको आईपीओ पश्चात रू. १ अर्ब ४७ करोड ६४ हजार पुग्नेछ ।
२०७६ असोज १६ गते प्रकाशित
वि.सं.२०७६ असोज १६ बिहीवार ०६:१९ मा प्रकाशित