काठमाडौं । दशैंपछिको दुई कारोबार दिन घटेको शेयर बजार मापक सूचक नेप्से र करोबार रकम दुबैमा मंगलबार सुधार भएको छ ।
नेप्से परिसूचक ५ अंकले बढ्दा कारोबार रकम पनि अघिल्लो दिनको तुलनामा करिब ३८ लाख रुपैयाँले सुधार भएको छ ।नेप्से ५.०८ अंकले बढेर ११४२.०४ बिन्दुमा पुगेको छ।
यस दिन १५१ कम्पनीका ७ लाख ६५ हजार ८९७ कित्ता शेयर किनबेच हुँदा २२ करोड २४ लाख रुपैयाँ बराबरको कारोबार भएको हो । यो सोमबारको तुलनामा ३८ लाख रुपैयाँले बढी हो । सोमबार २१ करोड ८६ लाख रुपैयाँ बराबरको कारोबार भएको थियो ।
मंगलबार कारोबारमा आएका दशवटा उपसमुहका सूचक सकारात्मक बन्दा नेप्से सूचक सकरात्मक देखिएको हो । उत्पादन र ब्यापारको सूचक भने स्थिर रह्यो । यस दिन जीवन बीमाको सूचक सबैभन्दा धेरै ३१.१५ अंकले बढेको छ ।
यस्तै होटल्स १७.३३, विकास बैंक ८.२, अन्य ५.६४, माइक्रोफाइनान्स ५.३३ र वाणिज्य बैंकको सूचकमा ४.५२ अंकले सुधार भएको छ ।
यस दिन सिद्धार्थ बैंकको सबैभन्दा धेरै ४ करोड ७ लाख रुपैयाँ बराबरको करोबार भएको छ । गत आर्थिक वर्षको मुनाफाबाट प्रस्ताव गरेको लाभांशको लागि बैंकले बुधबार बुकक्लोज तोकेको छ ।
मंगलबारसम्म कायम शेयरधनीले मात्र बैंकको लाभांश पाउने हुँदा मंगलबार यस बैंकको उच्च कारोबार भएको हो । बैंकको १ लाख २० हजार ९३० कित्ता शेयर खरीद बिक्री भएका छन ।
यस्तै एशियन लाइफ इन्स्योरेन्सको संस्थापक शेयर ३ करोड ६९ लाख, प्रभु बैंकको १ करोड ६६ लाख र कृषि विकास बैंकको १ करोड ४० लाख रुपैयाँ बराबरको कारोबार भएको छ । बाँकी कुनैपनि कम्पनीको करोबार रकम करोड नाघ्न सकेन ।
मंगलबार आरएमडीसी लघुवित्तको शेयरमूल्य सबैभन्दा धेरै ५.९३ प्रतिशतले बढेको छ। यस्तै ग्रीन डेभलपमेन्ट बैंक र सिर्नजी पावरको शेयरधनीले पनि मंगलबारको बजारबाट ४ प्रतिशत भन्दा बढीले कमाएका छन ।
यता सिटी एक्सप्रेस फाइनान्सको शेयरमूल्य भने सबैभन्दा धेरै ५.८८ प्रतिशतले घटेको छ । यस्तै हिमालयन पावर पार्टनर र एभरेष्ट इन्स्योरेन्सको शेयरधनीले ३ प्रतिशत बढीले गुमाएका छन ।
२०७६ असोज २८ गते प्रकाशित
वि.सं.२०७६ असोज २८ मंगलवार १५:५५ मा प्रकाशित
