काठमाडौँ । जिल्ला सरकारी वकिलको कार्यालय काठमाडौंले केही बेरमै निवर्तमान सभामुख कृष्णबहादुर महराविरुद्ध बलात्कारको प्रयास गरेको अभियोगमा जिल्ला अदालत काठमाडौंमा मुद्दा दर्ता गर्ने भएको छ ।
सरकारी वकिलको कार्यालयले प्रहरी प्रतिवेदनका आधारमा मुद्दाको तयारी गरिरहेको छ । सरकारी वकिलको कार्यालयका अनुसार, बिहीबार अपरान्हसम्ममा महराविरुद्ध मुद्दा दर्ता हुनेछ । तर कुन अभियोग र के मागदाबी हुनेछ भन्नेबारे सरकारी वकिलको कार्यालयले खुलाएको छैन ।
बिहीबार मुद्दा दर्तापछि समय बाँकी नरहने भएकाले शुक्रबारदेखि महरामाथि थुनछेकको बहस हुनेछ। अनि उनलाई थुनामा राखेर मुद्दा अघि बढाउने, धरौटी वा साधारण तारिखमा छाड्ने भन्ने अदालतले तय गर्नेछ ।
यसअघि तिहार बिदा सुरु हुनुभन्दा अघिल्लो दिन प्रहरीले महरामाथि दुई अभियोगमा मुद्दा चलाउन रायसहित प्रतिवेदन बुझाएको थियो ।
२०७६ कात्तिक १४ गते प्रकाशित
वि.सं.२०७६ कात्तिक १४ बिहीवार १५:१८ मा प्रकाशित
