२०७६ मंसिर ०४ गते प्रकाशित
काठमाण्डौ । प्रधानमन्त्री केपी शर्मा ओलीले केहीबेरमै मन्त्रिपरिषद् पुनर्गठन गर्दै हुनुहुन्छ । नेकपा सचिवालयको बैठकपछि सञ्चारकर्मीसँग कुरा गर्दै प्रवक्ता नारायणकाजी श्रेष्ठले केहीबेरमै मन्त्रिपरिषद पुनर्गठन हुने पुष्टि गर्नु भएको हो ।
‘प्रधानमन्त्रीले यसअघि नै संकेत गरेअनुसार नै तुरुन्तै मन्त्रिपरिषद पुनर्गठन हुन्छ’, सञ्चारकर्मीहरुले राखेका जिज्ञासाको जवाफ दिने क्रममा प्रवक्ता श्रेष्ठले भन्नुभयो, ‘पुनर्गठनपछि हुने मन्त्रीको संख्या र नामावली भन्ने प्रधानमन्त्री आफैले घोषणा गर्नुहुन्छ ।’
बालुवाटार स्रोतको अनुसार प्रधानमन्त्री ओली र अर्का अध्यक्ष दाहालबीच नयाँ बन्ने मन्त्रीहरुको लिष्ट तयार भए पनि गोप्य राखिएको छ । प्रधानमन्त्री ओलीले बुधबार बिहानै अर्का अध्यक्ष दाहाललाई लिएर मन्त्रिपरिषद पुनर्गठनबारे राष्ट्रपति विद्या भण्डारीसँग पनि परामर्श गर्नु भएको थियो ।
बुधबारको सचिवालय बैठकले अध्यक्षद्वको कार्यविभाजनको टुंगो पनि लगाएको छ । बैठकले बाँकी कार्यकाल केपी शर्मा ओली नै प्रधानमन्त्री बन्ने र प्रचण्डलाई कार्यकारी अध्यक्षको जिम्मेवारी दिने निर्णय गरेको छ ।
वि.सं.२०७६ मंसिर ४ बुधवार १६:४२ मा प्रकाशित
