काठमाडौं । नेपाल स्टक एक्सचेन्ज (नेप्से) लिमिटेडमा सुचिकृत विभिन्न ९ ओटा कम्पनीहरुले पुँजी बढाउन हकप्रद सेयर निष्कासन गर्न लागेका छन ।
जलविद्युत, बिमा र उत्पादनमुलक गरी ९ कम्पनीहरुले १६ अर्ब ५९ करोड ९० लाख रुपैयाँ बराबरको १६ करोड ५९ लाख ९० हजार रुपैयाँ बराबरको हकप्रद सेयर निष्कासन गर्न लागेका हुन ।
कम्पनीहरुले हकप्रद सेयर निष्कासन गर्न नेपाल धितोपत्र बोर्डमा आवेदन दिएका छन । सबैभन्दा बढी हकप्रद सेयर सरकार स्वामित्वको हाइड्रोइलेक्ट्रिसिटी इन्भेस्टमेन्ट एन्ड डेभलपमेन्ट कम्पनी लिमिटेड (एचआईडीसीएल) को छ ।
एचआईडीसीएलले जलविद्युतमा लगानी बढाउन ११ अर्ब रुपैयाँ बराबरको ११ करोड कित्ता हकप्रद सेयर निष्कासन गर्न लागेको हो । कर्मचारी सञ्चय कोष, नागरिक लगानी कोष र राष्ट्रिय बिमा संस्थाले संस्थापक हकप्रदमा लगानी नगरेपछि उसले अनुमति पाएको छैन । ३ संस्थाले ३ अर्ब ३० करोड रुपैयाँ थप लगानी गर्नुपर्ने छ । प्रतिफल न्युन भएको भन्दै कोषहरुले लगानी गर्न मानेको छैन ।
एचआईडीसीएलपछि अपी पावर कम्पनी लिमिटेडको छ । अपीले पनि जलविद्युत आयोजना बनाउन लगानी जुटाउन २ अर्ब २६ करोड ८० लाख रुपैयाँ बराबरको २ करोड २६ लाख ८० हजार कित्ता हकप्रद सेयर निष्कासन गर्न लागेको हो ।
अपीले हकप्रद सेयर निष्कासन गर्न नेपाल धितोपत्र बोर्डमा निवेदन दिएको लामो समय बितिसक्दा पनि उसले अनुमति पाएको छैन । बोर्डले जलविद्युत कम्पनीहरुलाई विद्युत नियमन आयोगको पूर्व स्वीकृति लिनुपर्ने व्यवस्था गरेको छ ।
यस्तै उत्पादनमुलक अन्तर्गत श्रीराम सुगर मिल्स लिमिटेडले पनि उद्योगको क्षमता विस्तारका लागि हकप्रद सेयर निष्कासन गर्न लागेको हो । श्रीरामले ८९ करोड ३ लाख ९४ हजार रुपैयाँ बराबरको ८९ लाख ३ हजार कित्ता हकप्रद सेयर निष्कासन गर्ने भएको छ । श्रीरामले पनि हकप्रद सेयर निष्कासन गर्न बोर्डमा आवेदन दिएको लामो समय बितिसकेको छ ।
यस्तै एनएलजी इन्स्योरेन्स कम्पनी लिमिटेड, प्रेरुडेन्सियल इन्स्योरेन्स कम्पनी लिमिटेड, शिखर इन्स्योरेन्स कम्पनी लिमिटेड र गुराँश लाइफ इन्स्योरेन्स कम्पनी लिमिटेडले हकप्रद सेयर निष्कासन गर्न बोर्डमा आवेदन दिएका छन ।
बिमा समितिले पुँजी बढाउन भनेपछि कम्पनीहरुले हकप्रद सेयर निष्कासन गर्न लागेका हुन । समितिले जीवन बिमा व्यवसाय गर्नेलाई २ अर्ब र निर्जीव बिमालाई १ अर्ब रुपैयाँ न्युनतम पुँजी तोकेको छ ।
यस्तै नाग्दी गु्रप पावर लिमिटेड, बरुण हाइड्रोपावर लिमिटेडले पनि हकप्रद सेयर निष्कासन गर्न आवेदन दिएको बोर्डले जनाएको छ ।
साउनयता विभिन्न ५ कम्पनीहरुले १ अर्ब ४६ करोड १२ लाख रुपैयाँ बराबरको १ करोड ४६ लाख १२ हजार कित्ता हकप्रद सेयर निष्कासन गर्न बोर्डबाट अनुमति पाएका छन । (क्यापिटल नेपालबाट)
हेर्नुहोस् सूचि :
[pdf-embedder url=”http://www.arthatantra.com/wp-content/uploads/2019/12/hakprad-share.pdf” title=”hakprad share”]
२०७६ मंसिर २३ गते प्रकाशित
वि.सं.२०७६ मंसिर २३ सोमवार ०८:५० मा प्रकाशित