काठमाडौं। कुमारी बैंकले तीन अर्ब रूपैयाँको ऋणपत्र निष्कासन गर्ने अनुमति पाएको छ । धितोपत्र बोर्डले ’कुमारी बैंक डिवेन्चर(२०८६’ को निष्कासन अनुमति प्रदान गरेको छ।
बैंकले १०.२५ प्रतिशत ब्याजदरमा १० वर्षका लागि उक्त ऋणपत्र निष्कासन गर्न लागेको हो । तीन अर्बमध्ये एक अर्ब २० करोड रूपैयाँको ऋणपत्र सर्वसाधारणका लागि निष्कासन गर्नेछ । बाँकी एक अर्ब ८० करोड रूपैयाँको ऋणपत्र ’प्राइभेट प्लेसमेन्ट’ मार्फत बिक्री गर्नेछ ।
ऋपत्रको निष्कासन तथा बिक्री प्रबन्धक नेपाल एसबिआई मर्चेन्ट बैंक छ । कुमारीको हालको चुक्ता पुँजी ९ अर्ब ५५ करोड रूपैयाँ छ ।
साथै जगेडा कोषमा २ अर्ब ५२ करोड रूपैयाँ छ। तीन अर्ब रुपैयाँको ऋणपत्र निष्कासनसँगै बैंकको दीर्घकालीन पुँजी तथा पुँजी कोष थप बढ्ने छ ।
नेपाल राष्ट्र बैंकले मौद्रिक नीतिमार्फत बैंकहरूले ऋणपत्र निष्कासन गर्नैपर्ने अनिवार्य गरेको व्यवस्थालाई पालना गर्ने क्रममा ऋणपत्र निष्कासन गर्न लागेको हो ।
अन्य बैंकहरूले ५÷७ वर्षका लागि ऋणपत्र निष्कासन गर्दै आएकोमा कुमारीले भने एकैपटक १० वर्षे अवधिको ऋणपत्र निष्कासन गर्न लागेको हो। यसले बैंकलाई वर्षको दायित्व सिर्जना गर्नेछ । बढ्दो क्रममा रहेको ब्याजदरले गर्दा लगानीकर्ताहरूको ध्यान ऋणपत्रमा छैन ।
तर बैंकले लगानीकर्तालाई आकर्षित गर्न १० वर्षका लागि ऋणपत्र निष्कासन गर्न लागेको हो। बैंकसँग ७८ अर्ब रूपैयाँभन्दा माथि निक्षेप छ ।
साथै ७६ अर्ब रूपैयाँभन्दा माथिको कर्जा लगानी छ। निक्षेप र कर्जाको अन्तर कम हुँदा बैंकको पुँजीकोष अनुपात ११.५७ प्रतिशत छ ।
२०७६ पुस ०१ गते प्रकाशित
वि.सं.२०७६ पुस १ मंगलवार १३:२४ मा प्रकाशित
