काठमाडौं । गत कात्तिक महीनादेखि रिक्त रहेको नेपाल धितोपत्र बोर्डको अध्यक्ष पदका लागि नयाँ नियुक्ती प्रक्रिया अन्तिम चरणमा पुगेको छ ।
सोमवार अर्थमन्त्रालयद्वारा गठित छनोट समितिले तीन जनाको नाम सिफारिस गरेको छ । सिफारिस हुनेमा भीष्मराज ढुंगाना, निरज गिरी र केशव श्रेष्ठ रहेका छन् ।
अर्थ मन्त्रालयले कात्तिक २० गते राष्ट्रिय योजना आयोगका सदस्य रामकुमार पफुँयालको संयोजकत्वमा तीन सदस्यीय छनोट समिति गठन गरेको थियो । उक्त समितिले सोमवार सर्ट्लिष्टमा परेका पाँच जनाको अन्तरवार्तापछि तीन जनाको नाम सिफारिस गरेको हो ।
आवेदकहरुको व्यक्तिगत विवरण, कार्यानुभवको र कार्यपत्र प्रस्तुतीको आधारमा उत्कृष्ट तीन जनाको नाम सिफारिस गरिएको संयोजक फुयालले जानकारी दिए । उनका अनुसार अव यी तीन जना मध्येबाट सरकारले एक जना छनोट गर्नेछ ।
बोर्डको अध्यक्ष पदका लागि अर्थ मन्त्रालयले गत मंसिर ६ गते सार्वजनिक सूचना मार्फत आवेदन माग गरेको थियो । अध्यक्षको लागि भीष्मराज ढुंगाना, निरज गिरी, केशव श्रेष्ठ, सिताराम थपलिया, नवराज अधिकारी, नरेन्द्र सिजापति, निल सारु मगर र डा बलराम पाठकले उमेदवारी दिएका थिए ।
छनोट समितिले पहिलो चरणमा पाँच जनाको नाम सर्ट्लिष्ट गरेको थियो । जसमा भीष्मराज ढुंगाना, निरज गिरी, केशव श्रेष्ठ, सिताराम थपलिया र नवराज अधिकारीको नाम परेको थियो ।
२०७६ पुस १५ गते प्रकाशित
वि.सं.२०७६ पुस १५ मंगलवार १४:११ मा प्रकाशित
