काठमाडौं । वाणिज्य बैंकहरूले कुल कर्जाको औसत २१ प्रतिशत ठूला २० ऋणीलाई दिने गरेको पाइएको छ । एक वर्षको अवधिमा विभिन्न समयमा सार्वजनिक भएका तथ्यांकहरूलाई विश्लेषण गर्दा बैंकहरू निश्चित समूह वा ग्राहकमा उच्च दरमा केन्द्रीकृत हुने गरेको देखिन्छ ।
पुस ०७५ देखि असोज ०७६ सम्म १६ वाणिज्य बैंकको यो तथ्यांक सार्वजनिक भएको हो । तथ्यांकअनुसार नेपाल इन्भेष्टमेन्ट बैंकको कर्जा सबैभन्दा धेरै केन्द्रीकृत भएको छ ।
बैंकले चैत ०७५ मा १ खर्ब २४ अर्ब लगानी गर्दा मुख्य २० ऋणीलाई ४० अर्ब लगानी गरेको छ । ग्लोबल आइएमई बैंकको कर्जा केन्द्रीकरण १६ वटामा सबैभन्दा कम छ ।
बैंकले असोज ०७६ सम्ममा प्रमुख २० मा १३ प्रतिशत लगानी गरेको छ । समग्रमा यी बैंकहरूले १३ खर्ब ४९ अर्ब कर्जा लगानी गर्दा यस्ता ऋणीहरूले २ खर्ब ८३ अर्ब रकम कर्जा पाएका छन ।
सबै वाणिज्य बैंकहरूको यो तथ्यांक उपलब्ध नभए पनि यसले बैंकहरूको लगानी प्रवृत्तिलाई भने देखाएको छ । नयाँ पत्रिका दैनिकमा समाचार छ ।
वि.सं.२०७६ माघ २२ बुधवार ०९:११ मा प्रकाशित
