हेटौंडा । मकवानपुरको मनहरीमा बाग्मती प्रदेश सरकारले कागज उत्पादन गर्ने उद्योग स्थापना गर्ने तयारी थालेको छ । सरकारी स्वामित्वको कागज उद्योग स्थापना गरी कायाज आयात न्यून गर्ने उद्धेश्यले प्रदेश सरकारले कागज उद्योगको डीपीआर तयारी शुरु गरेको हो ।
कागज उद्योग स्थापनाको मस्यौदामाथि छलफल भइरहेको बताइएको छ । प्रदेशको उद्योग, पर्यटन, बन तथा वातावरण मन्त्रालयले मनहरी गाउँपालिका–८ स्थित राप्तीको नदीउकास जमिनमा करिब दुई अर्ब रुपैयाँ लागतमा कागज उद्योग निर्माण गर्न लागिएको हो ।
नेपालमा प्रयोग हुने कागज बिदेशबाट आयात भइरहेकोले कागजमा आत्मनिर्भर बन्न उद्योग स्थापना गर्न लागिएको उद्योग, पर्यटन, बन तथा वातावरण मन्त्रालयले बताएको छ ।
प्रदेश सरकार, निजी क्षेत्र, संघीय सरकारसमेतको लगानीमा कागज उद्योग स्थापना गर्न लागिएको हो । हेटौंडा–मनहरी सडकखण्डको जयसिं नजिक जग्गाको टुंगो लागिसकेको छ ।
उद्योगी, सरकार र समुदायको साझेदारीमा छलफल गरेर काम अगाडि बढाउन लागिएको मन्त्री नेपालका निजी सचिव नवराज पुडासैनीले जानकारी दिए । तीन चरणको काम सकिएको उनले बताए ।
गाउँपालिका अध्यक्ष, सभासद र स्थानीयबासीसँग जग्गाको विषयमा छलफल गरी टुंगो लगाइएको उनले जानकारी दिए । कागज उद्योग सञ्चालनका लागि लगानीकर्ता र बैंकरसँगको छलफल पनि सकिएको छ ।
कच्चापदार्थको उपलब्धतादेखि उत्पादनलाई बजारीकरणसम्मको सम्भाब्यताबारे छलफल चलिरहेको छ । नाफामा जानसक्ने आधारहरु र सम्भाबित जोखिमका बारेमा बिस्त्रृत अध्ययन गर्न मन्त्रालयका सचिव शिव वाग्लेको संयोजकत्वमा सात सदस्यीय समिति पनि गठन गरिएको छ ।
वहुवर्षीय योजनामा राखेर काम गर्ने तयारी छ । चालू आर्थिक वर्षमा कागज उद्योगको डीपीआरका लागि रू.५० लाख उद्योग, पर्यटन, बन तथा वातावरण मन्त्रालयले छुट्याएको छ ।
कागज उद्योगका लागि पर्याप्त पानी आवश्यक पर्ने भएकाले राप्ती नदीउकास जमीन उपयुक्त हुने वातावरणबिदले सुझाएका छन् ।
कुन मोडालिटीमा उद्योग सफल रुपमा सञ्चालन गर्न सकिन्छ भन्ने विषयमा छलफल अगाडि बढाइएको छ । सरकारले मात्र उद्योग सञ्चालन गर्दा बिगतमा सरकारी उद्योगले भोग्नु परेको नियती नभोग्नका लागि मोडालिटीका बारेमा पनि छलफल जारी रहेको छ ।
निजी क्षेत्रसँगको साझेदारीमा उद्योग खोल्ने मोडालिटीमा सरकार र निजी क्षेत्रको शेयरमा कम्पनी तयार गरेर काम गर्न लागिएको उनले बताए । प्रदेश सरकारले निर्माण गर्न लागेको कागज उद्योगका लागि जग्गा व्यबस्थापन भएको मनहरी गाउँपालिका अध्यक्ष एकराज उप्रेतीले बताए ।
मनहरीमा सरकारी जमीन १० हजार रोपनीभन्दा बढी रहेको र भूउपयोग नीति बनाएर उद्योग स्थापना गर्ने तयारी गाउँपालिकाले गरिरहेको अध्यक्ष उप्रेतीले बताए । मनहरी गाउँपालिकाले ५ वर्षको आवधिक योजना तर्जुमा कार्यशाला शुक्रवार र शनिवार सम्पन्न गरेको छ ।
१० हजार रोपनीभन्दा बढी नदीउकास जमीनलाई उद्योग स्थापनाका लागि प्रयोगमा ल्याइने उनले बताए ।
वि.सं.२०७६ माघ २५ शनिवार १७:४९ मा प्रकाशित
