काठमाडौं । मिर्गौला प्रत्यारोपणको चौथो दिन प्रधानमन्त्री केपी ओलीको स्वास्थ्यमा राम्रो सुधार भइरहेको छ । फागुन २१ गते मिर्गौला प्रत्यारोपण गरेपछि शनिबार पहिलो पटक प्रधानमन्त्री ओलीलाई नर्मल खाना दिइएको छ ।
त्रिभुवन विश्वविद्यालय शिक्षण अस्पतालका कार्यकारी निर्देशक प्रा.डा.प्रेमकृष्ण खड्गाका अनुसार शनिबारबाट नर्मल खान दिन थालिएको हो ।
‘सम्माननीय प्रधानमन्त्री केपी शर्मा ओलीज्यूको मिर्गौला प्रत्यारोपण गरिएको आज चौथो दिन, उहाँको स्वास्थ्यस्थितिमा राम्रो सुधार भइरहेको छ’, प्रा.डा. खड्गाले भने, ‘ उहाँलाई नर्मल खाना दिन थालिएको छ ।’
प्रधानमन्त्री ओलीलाई सामान्य हिँडडुल गराउनुका साथै फिजियोथेरापीलाई निरन्तरता दिइएको र उनका भाइटल तथा ल्याब सूचक सामान्य अवस्थामा रहेको प्रा.डा. खड्गाले बताए ।
सँगै प्रधानमन्त्रीकी मिर्गौला दाता उनकी भान्जी समीक्षा संग्रौलाको स्वास्थ्यमासमेत सुधार भइरहेको प्रा.डा खड्गाले जानकारी दिए। उनको पनि सबै भाइटल र ल्याब सूचक सामान्य अवस्थामा छन् । समीक्षालाईसमेत नर्मल खाना दिइएको छ भने हिँडडुल गर्न थालिसकेकी छन् ।
अस्पतालले हरेक दिन दिउँसो ४ बजे विज्ञप्तिमार्फत् प्रधानमन्त्री र मिर्गौलादाता समीक्षाको स्वास्थ्य अवस्थाबारे जानकारी गराउँदै आएको छ ।प्रधानमन्त्री ओलीको फागुन २१ गते दोस्रो पटक सफलतापूर्वक मिर्गौला प्रत्यारोपण भएको थियो। प्रत्यारोपणपछि ओली सीसीयूमा रहेर स्वास्थ्यलाभ गरिरहेका छन ।
प्रधानमन्त्री ओली र मिर्गौला दाता भान्जी पर्ने संग्रौला फागुन १९ गते अस्पताल भर्ना भएकी थिइन् । प्रत्यारोपणपछि ओलीको शरीरमा अब चारवटा मिर्गौला भएका छन् ।
प्रधानमन्त्री ओलीको एउटा मिर्गौलाले काम गर्न छाडेपछि २०६४ सालमा भारतको एपोलो अस्पतालमा पहिलो पटक मिर्गौला प्रत्यारोपण गरिएको थियो ।
स्वास्थ्यमा समस्या देखिएपछि ओली उपचारका लागि गत भदौंमा सिंगापुर गएका थिए। त्यहाँ उनको’प्लाज्माफेरेसिस’ गरिएको थियो। त्यहाँ १५ दिनको बसाइपछि प्रधानमन्त्री स्वदेश फर्केका थिए।त्यसपछि उनी नियमित डायलासिस गर्दै आएका थिए ।
वि.सं.२०७६ फागुन २४ शनिवार १६:२२ मा प्रकाशित
