काठमाडौं । मिर्गौला प्रत्यारोपणपछि अस्पतालमा आराम गरिरहनुभएका प्रधानमन्त्री केपी शर्मा ओलीलाई बुधबारसम्म डिस्चार्ज गरिने भएको छ । प्रधानमन्त्रीको स्वास्थ्यमा क्रमिक सुधार आएकाले अब डिस्चार्ज गर्न सकिने एक चिकित्सकले बताउनुभयो ।
’प्रधानमन्त्री ज्यूको स्वास्थ्य अवस्था सामान्य भइसकेको छ । उहाँलाई मंगलबार वा बुधबार हामी डिस्चार्ज गर्छौं।’ प्रधानमन्त्रीको उपचारमा संलग्न एक चिकित्सकले थप भने,’प्रधानमन्त्री हिँड्डुल गर्न सक्ने र आफैंले खानेकुरा खान सक्ने भइसक्नुभएको छ । त्यसैले अब डिस्चार्जको तयारी गर्दा हुन्छ।’
अस्पतालबाट डिस्चार्ज नभएसम्म कसैलाई पनि भेट्न नदिने चिकित्सकहरूले बताएका छन । प्रधानमन्त्री ओलीले पनि चिकित्सकले भने अनुसार नै डिस्चार्ज हुने बताउनुभएको छ ।
प्रधानमन्त्रीलाई मिर्गौला दान गर्ने समिक्षा संग्रौलालाई पनि सँगै डिस्चार्ज गर्ने तयारी भइरहेको ती चिकित्सकले जानकारी दिए । मिर्गौला प्रत्यारोपणका लागि फागुन १९ मा प्रधानमन्त्री ओली अस्पताल भर्ना हुनुभएको थियो । उहाँको भोलिपल्ट दोस्रो पटक मिर्गौला प्रत्यारोपण भएको थियो ।
वि.सं.२०७६ फागुन २६ सोमवार १२:२७ मा प्रकाशित