काठमाडौं । पूर्वसञ्चारमन्त्री गोकुल बास्कोटाको घरमा बम विष्फोट भएको छ । बम विष्फोटबाट घरको कम्पाउन्डका साथै झ्याल ढोकामा क्षति पुगेको छ । विष्फोटबाट छिमेकीको घर र रोकिराखेको भ्यानमा समेत क्षति भएको छ ।
आज बिहान ७ः४५ बजे भएको बम विष्फोटका कारण स्थानीयहरु त्रसित भएका छन् । बिस्फोटको समयमा बास्कोटा निवास बाहिर रहेका थिए । मनहराफाँटस्थित निर्माणाधीन उक्त घरमा रिमोट कन्ट्रोलबाट बम विस्फोट गराइएको प्रहरीको प्रारम्भिक अनुसन्धानबाट खुलेको भक्तपुर प्रहरी प्रमुख सविन प्रधानले जनाएका छन् । प्रेसर कुकर बम राखेर रिमोट कन्ट्रोलबाट विस्फोट गराइएको देखिएको प्रधानको भनाई छ । यसका साथै घटनास्थलमा पाइएको एक झोलामा प्रेसर कुकरका टुक्रा र विष्फोटमा प्रयोग हुने सामग्रीहरु समेत भेटिएको बताइएको छ ।
एसपी प्रधानका अनुसार, बास्कोटानिवासमा आक्रमण हुने अनुमान प्रहरीले पहिल्यै गरेको थियो । त्यसैले अडियो काण्डपछि प्रहरीले बास्कोटा निवाससँगै वरिपरि सुरक्षा सतर्कता बढाएको थियो । तथापि, प्रहरीले कुनै पत्तो नपाउने गरी घरको कम्पाउण्डभित्रै प्रेसर कुकर बम बिस्फोट भएको थियो । कसरी विस्फोटको घटना भयो भन्नेबारे भने उनले केही नखुलाएतापनि विप्लब पक्षले विस्फोट गराएको हुन सक्ने प्रहरीको अनुमान रहेको छ । बुधबार सरकारले नेत्रविक्रम चन्द ‘विप्लव’ समूहलाई प्रतिवन्ध लगाएको ठीक एक वर्ष पुगेको छ । विप्लव समूहलाई प्रतिवन्ध लगाएको वर्ष दिनमा पूर्वसञ्चारमन्त्री गोकुल बास्कोटा विप्लव समूहको टार्गेटमा पर्छन् भन्ने सूचना प्रहरीलाई रहेको बताइएको छ ।
त्यसैले बन्दै गरेको घरको सुरक्षामा सशस्त्र प्रहरीका सईको कमाण्डमा दुई जना प्रहरीलाई सुरक्षाका लागि राखिएको भएतापनि विस्फोटको घटना भएको हो ।
विष्फोटपछि सो क्षेत्रमा सेना र प्रहरीको टोली पुगेर अनुसन्धान जारी राखेका छन् । साथै भक्तपुरका प्रमुख जिल्ला अधिकारी हुमकला पाण्डेले पनि घटनास्थलको निरीक्षण गर्नुभएको छ ।
वि.सं.२०७६ फागुन २८ बुधवार ११:३५ मा प्रकाशित