काठमाडौं । नेपालीका श्रम गन्तव्य मुलुकहरु कोरोना भाइरसबाट आक्रान्त भएपछि नेपाल सरकारले श्रम स्वीकृति रोक्ने निर्णय गरेको छ । विश्व स्वास्थ्य स्वास्थ्य संगठनले कोरोना भाइरसलाई महामारीको घोषणा गरेपछि बिहीबार बसेको उच्चस्तरीय समन्वय समितिको बैठकले अनिश्चितकालसम्मका लागि श्रम स्विकृति रोक्ने निर्णय गरेको हो ।
साथै अध्ययनका लागि विदेश जाने विद्यार्थीहरुलाई पनि ३० अप्रिल भन्दा अगाडि नो अब्जेक्सन सर्टिफिकेट नदिने निर्णय गरेको छ । उपप्रधान एवम् रक्षामन्त्री ईश्वर पोखरेलको अध्यक्षतामा बसेको उच्चस्तरीय समन्वय समितिको बैठकले कोरोना भाइरस रोकथामका उपायस्वरुप पर्यटक भिसा नदिने र छिमेकी मुलुक भारतसँग जोडिएका सीमानाकाहरु सीमित गर्ने निर्णय पनि गरेको छ । नेपालले तेस्रो मुलुकका नागरिकहरुलाई स्थलमार्ग हुँदै नेपाल प्रवेशमा दिइँदै आएको सुविधा १४ मार्च २०२० देखि ३० अप्रिल २०२० सम्मका लागि रोकेको छ ।
यसअघि भिसा लिइसकेका विदेशी नागरिकहरुले भने नेपालको अध्यागमन विन्दुमा आईपुग्ने मिति सम्ममा सात दिनभित्रको स्वास्थ्य जाँच रिपोर्ट अध्यागमन कार्यालयमा बुझाउनु पर्ने व्यवस्था गरिएको छ । १४ मार्च २०२० देखि नेपाल प्रवेश गर्ने नेपाली, गैरआवासीय नेपाली र विदेशीहरुले १४ दिनसम्म क्वारेन्टाइनमा बस्नुपर्ने छ ।
नेपाल सरकारले दक्षिण कोरियामा मात्र मार्च महिनाभरका लागि कामदारहरु नपठाउने निर्णय यस अघि नै यसअघि नै गरीसकेको छ । कोरिया र कतारले विदेशी नागरिकहरुलाई आफ्नो देश छिर्नमा रोक लगाइसकेका छन् भने कतारले सबै हवाइ उडानमा रोक लगाएको छ ।
वि.सं.२०७६ फागुन ३० शुक्रवार १०:४३ मा प्रकाशित