मकवानपुर । बागमती प्रदेशका मुख्यमन्त्री डोरमणी पौडेलले कोरोना भाइरस संक्रमणविरुद्ध लड्न प्रदेश सरकार तयारी अवस्थामा रहेको बताउनुभएको छ ।
मुख्यमन्त्री पौडेलले संक्रमण हुन नदिन सचेतनाका साथै प्रदेशका विभिन्न स्थानमा हेल्थ डेक्स स्थापना गरिएको र जनशक्ति समेत तयारी अवस्थामा रहेको बताउनुभयो । प्रदेशभरीका अस्पताललाई तयारी अवस्थामा रहन निर्देशन दिएको मुख्यमन्त्री पौडेलको भनाइ छ । सशस्त्र प्रहरी बलसँगको समन्वयमा ४० शैय्याको आईसोलेसन सेन्टर बनाउने तयारीमा सरकार रहेको समेत उहाँले बताउनुभयो ।
मुख्यमन्त्री पौडेलले प्रदेशमा अब विकासको कामले तीव्रता पाउने दाबी गर्नुभएको छ । यसअघि डिपिआर गर्न समय लागेकोले विकासको काममा केही ढिलाई भएको भन्दै डिपिआरको काम सकिएकाले विभिन्न योजनाहरु अब टेण्डर प्रक्रिया अघि बढाउने पौडेलले प्रतिवद्धता व्यक्त गर्नुभयो ।
वि.सं.२०७६ चैत ६ बिहीवार १६:१९ मा प्रकाशित