जुम्ला । प्रभु बैंक र नेपालआर्थिक पत्रकार समाज (सेजन) को संयुक्त आयोजनामा जुम्लाको खलंगामा वित्तिय साक्षरता कार्यक्रम सम्पन्न भएकोे छ ।
भौगौलिक रूपमा विकट रहेको सो जिल्लाका महिलालाई वित्तीय साक्षरता अभिवृद्धि गर्ने उद्देयश्का साथ जुम्ला सदरमुकाम खलंगामा साक्षरता कार्यक्रम गरिएको हो ।
कार्यक्रममा चन्दननाथ नगरपालिकाका मेयर कान्तिका सेजुवालले वित्तीय पहुँचमा महिला पुगे पनि चेतनाको अभावले उत्पादनमुखी क्षेत्रमा लगानी नभएको बताइन् ।
बचतसँगै, सीप तथा रोजगारमुलक क्षेत्रमा लगानी गर्न नगरपालिकाले पनि सघाउने बताउँदै उनले सहकारी तथा वित्तीय क्षेत्रले पनि वित्तीय साक्षरता अभियान सञ्चालन गर्न सुझाव दिइन् ।
जुम्लामा पुरुषको तुलनामा महिला आर्थिक रूपमा सबल बन्दै गएको तथा बाह्य तथा आन्तरिक आर्थिक कारोबारमा समेत महिलाको पहुँच वृद्धि हुँदै गएको उनले बताइन् ।
नेपाल राष्ट्र बैंकका पूर्वकार्यकारी निर्देशक त्रिलोचन पंगेनीले पैसाको महत्त्वबारे जानकारी गराउँदै आवश्यक परेको ठाउँमा मात्र पैसा खर्च गर्नुपर्ने बताए ।
प्रभु बैंक कर्णाली प्रदेश प्रमुख शरद तिमल्सिनाले गाउँगाउँमा बैंक विस्तार गरिसकेकाले सबैमा वित्तिय साक्षरता बढाउँदै जानुपर्ने बताए । उनले सुगम क्षेत्रमा मात्र नभएर दुर्गम क्षेत्रमा पनि बैकिङ्ग सेवा विस्तार गरिसकेकाले सर्वसाधारणलाई यसबाट लाभ लिन आग्रह गरे ।
वि.सं.२०७६ चैत ७ शुक्रवार १२:२६ मा प्रकाशित