काठमाडौं । कार्यालयबाट दिँदै आएको सवारी पास जिल्ला प्रशासन कार्यालय गुल्मीले मंगलबारदेखि अनलाइनबाटै दिने व्यवस्था गरेको छ ।
कोरोना भाइरसको संक्रमणबाट बच्न उच्च सर्तकर्ता अपनाउँदै प्रविधिको प्रयोग गरी सवारी पास दिने व्यवस्था मिलाएको हो ।
सरकारले लकडाउनको समयमा जिल्ला प्रशासन कार्यालयको अनुमति लिएर मात्र सवारी चलाउन पाउने व्यवस्था गरेको छ । सो पास कार्यालयमा स्वयंम व्यक्ति आएर नलिई समाजिक सञ्जाल फेसबुक म्यासेन्जर, भाइबर र इमेलबाट लिन सकिने जिल्ला प्रशासन कार्यालय गुल्मीका सूचना अधिकृत लक्ष्मण पाण्डेले जानकारी दिनुभयो ।
पास लिने व्यक्तिले आवश्यक विवरण पठाउनुपर्ने र आवश्यकताको आधारमा पासको व्यवस्था गरिने अधिकृत पाण्डेले बताए । पास लिन कार्यालयमा आउँदा समस्या हुने गरेको र भीडभाड पनि हुने भएकाले प्रविधिलाई सदुपयोग गरी पासको व्यवस्था गरिएको हो ।
पासका लागि कारणसहितको निवेदन, सवारी प्रयोग गर्ने व्यक्तिको नाम, कहाँदेखि कहाँसम्म जानुपर्ने र सवारीको ब्लुबुक, सवारी चालक अनुमतिपत्र लगायतको प्रमाणहरु पठाउनुपर्नेछ ।
वि.सं.२०७६ चैत १८ मंगलवार ०७:२६ मा प्रकाशित