काठमाडौं । कोरोना भाइरसबाट संक्रमित एक २६ वर्षीय इजरायली महिलालाई अस्पताल लगेर भेन्टिलेटरमा राखिएको थियो, उनले शल्यक्रियामार्फत स्वस्थ बच्चालाई जन्म दिएकी छिन् ।
गत महिनाको अन्त्यमा उनी आफ्नै हिंडेर तेल अभिभ नजिकैको सेवा मेडिकल सेन्टरमा पुगेकी थिइन् । सुरुमा उनलाई ज्वरो र वान्ता आएको अस्पतालका प्रवक्ता जोडी सिंगरले बताइन् ।
शिशुमा कोरोना भाइरस नेगेटिभ देखिएको छ । तर आमाले अझै शिशुलाई समाउन पाएकी छैनन् । उनी क्रिटिकल केयर युनिटमै छिन् ।
‘अर्को साता यी आमा–छोराको भेट हुने अपेक्षा गरिएको छ, जब आमा डिस्चार्ज हुन्छिन्,’ सिंगरले भनिन् ।
शुक्रबार बिहान इजरायलमा कोरोना भाइरस संक्रमितको संख्या १० हजार नाघेको छ, ९५ जनाले ज्यान गुमाइसकेका छन् ।–न्यूयोर्क पोस्ट
वि.सं.२०७६ चैत २९ शनिवार १९:०४ मा प्रकाशित