काठमाडौं । एनसेलले ४ वर्षपछि आफ्नो सेयर स्वामित्व खरिद बिक्री हुँदा तिर्नुपर्ने पुँजीगत लाभकर वापतको सबै रकम सरकारलाई बुझाएको छ । आइतबार एनसलेले बुझाउन बाँकी रु.१४ अर्ब ३३ करोड पुँजीगत लाभकर ठूला करदाता कार्यालयलाई बुझाएको जानकारी दिएको हो ।
एनसेलका अनुसार यो रकम बझुाएसँगै यसको चार वर्षदेखिको पूँजीगत लाभकर विवादको अब अन्त्य भएको छ । एनसेलले रु.२२ अर्ब ४४ करोड बुझाउनुपर्ने भएपनि सबै रकम समयमा नै नबुझाउन ढिलो गरेका कारण थपिएको व्याज र जरीवानासहित कुल रु.२३ अर्ब ४३ करोड ५६ लाख ५२ हजार ५ सय ४६ रुपैयाँ बुझाएको हो ।
एनसेलले तिनुपर्ने आफ्नो दायित्वको सबै लाभकर चुक्ता गरेको ठूला करदाता कार्यालयले जानकारी दिएको छ । ठूला करदाता कार्यालयले यसअघि एनसेललाई सेयर स्वामित्व बिक्रीवापतको कुल पूँजीगत लाभकर रु.२२ अर्ब ४४ करोड तोकेको थियो ।
सोही अनुसार कम्पनीले गत पुष १६ गते रु.४ अर्ब ५० करोड तिरेको थियो । त्यसपश्चात कम्पनीले तिर्नुपर्ने व्याजसहितको बाँकी रकम रु.१९ अर्ब मध्ये रु.४ अर्ब ६० करोड १८ चैत्रमा तिरेको थियो ।
एनसेलले पुस १६ यताको ब्याजसहित रु.१४ अर्ब ४० करोड रुपैयाँ तिर्न बाँकी थियो । एनसेलले तिर्न बाँकी रकम पनि सरकारले लकडाउन सकिएपछि १५ दिनको समय दिएर सम्पूर्ण रकम असुल गर्ने सरकारी तयारी थियो ।
एनसेलले नेपाली ब्यांकसँग ऋण लिएर लाभकर तिरेको हो । एनसेलले नेपाल इन्भेष्टमेन्ट ब्यांंक, नबिल ब्यांक र ग्लोबल आइएमई ब्यांक, हिमालय ब्यांंक, सानिमा ब्यांक र एभरेष्ट ब्यांकबाट ऋण लिएर लाभकर सरकारलाई बुझाएको उल्लेख छ ।
वि.सं.२०७६ चैत ३० आइतवार १७:४० मा प्रकाशित