तेहरान । इरानको राजधानी तेहरानमा शक्तिशाली भूकम्प गएको छ । तेहरानको अल्वोर्ज प्रान्तमा गएको ५.१ म्याग्निच्युडको भूकम्पका कारण एक जनाको मृत्यु हुनाको साथै २३ जना घाइते भएको इरान प्रेस न्युज एजेन्सीले जनाएको छ। भूकम्प राति पौने एक बजे गएको थियो ।
भूकम्पपछि भाग्ने क्रममा च्यापिएर ६० वर्षका एक वृद्धको मृत्यु भएको न्युज एजेन्सीले जनाएको छ। सोही स्थानमा अन्य ६ जना पनि घाइते भएका छन् ।
कोरोना भाइरसको चपेटामा रहेको इरानमा अर्को प्राकृतिक विपत्ति आइपरेको हो। आधा रातमा आएको भूकम्पका कारण त्यहाँको अवस्था तनावपूर्ण भएको छ । मध्यरातमा तेहरानको सडकमा मानिसहरु चिच्चाइरहेका थिए। भूकम्पपछि पनि दुई वटा परकम्पन गएका थिए ।
वि.सं.२०७७ वैशाख २६ शुक्रवार १२:३२ मा प्रकाशित
