काठमाडौं । फेरि नेपालमा थप ४८ जनामा कोरोना संक्रमण पुष्टि भएको छ । दैलेख, जुम्ला, पाल्पा, रुपन्देही लगायतका जिल्लामा नयाँ संक्रमित थपिएका हुन् ।
योसँगै नेपालमा संक्रमितको संख्या १६ सय १५ पुगेको छ । कर्णाली स्वास्थ्य विज्ञान प्रतिष्ठान जुम्लामा गरिएको परीक्षणमा दैलेखका २४ र जुम्लाका १९ जनामा कोरोना पुष्टि भएको हो ।
दैलेखका संक्रमितमध्ये दुई महिला छन् । जुम्लाका १९ जना संक्रमित सबै पुरुष भएका प्रतिष्ठनले जनाएको छ । यसको पुष्टि स्वास्थ्य तथा जनसंख्या मन्त्रालयले गर्न भने बाँकी छ ।
भैरहवामा रहेको प्रादेशिक प्रयोगशालामा गरिएको परीक्षणमा पाल्पाका १९, ३८ र ४० वर्षका पुरुष र रुपन्देहीका ४२ वर्षका पुरुष र ७० वर्षकी महिलामा कोरोना पुष्टि भएको मन्त्रालयले जनाएको छ । नेपालमा आइतबार १ सय ६६ जनामा कोरोना पुष्टि भएको थियो ।
वि.सं.२०७७ जेठ १९ सोमवार ०९:५८ मा प्रकाशित
